«Առավոտի» փետրվարի 7-ի համարում տպագրված «Հատուկ քննչական ծառայությունում ահազանգել են նախկին վարչապետի, նրա որդու, նախկին պատգամավորի կեղծ գործարքների մասին» վերնագրով հրապարակման առնչությամբ խմբագրությունն ստացել է փաստաբան Սարգիս Գրիգորյանի հետեւյալ պատասխանը.
«Թույլ տվեք տեղեկացնել Ձեզ, որ Արգամ Աբրահամյանը ներգրավված չի եղել որեւէ կարգավիճակով ոչ մի քրեական գործի շրջանակում: Ինչ վերաբերում է Ամիրյան փողոցում գտնվող Նացիոնալ հյուրանոցի մասին հայտարարություններին, ապա դրանք նույնպես չեն համապատասխանում իրականությանը, քանի որ նշված հյուրանոցը չի ձեռք բերվել եւ/կամ կառուցվել Արգամ Աբրահամյանի կողմից: Հոդվածում խոսվում է նաեւ «Գազել» եւ «Բոգդան» միկրոավտոբուսների ձեռք բերման մասին: Նշեմ, որ Արգամ Աբրահամյանը չի ձեռք բերել տրանսպորտային միջոցներ, որոնց մասին հիշատակվում է նշված է հոդվածում: Հաշվի առնելով վերոգրյալը` խնդրում եմ Ձեզ պաշտոնապես հերքել Արգամ Ամբրահամյանի վերաբերյալ հրապարակված տեղեկությունները: Հայտնում եմ իմ պատրաստակամությունը տրամադրել լրացուցիչ տեղեկություններ»:
Փաստաբան ՍԱՐԳԻՍ ԳՐԻԳՈՐՅԱՆ
«Առավոտ» օրաթերթ,
12.02.2019
