ԱԺ տարածքային կառավարման, գյուղատնտեսության եւ բնապահպանության հարցերի հանձնաժողովի անդրանիկ նիստում այսօր միաձայն հանձնաժողովի նախագահի տեղակալ ընտրվեց «Բարգավաճ Հայաստան» կուսակցության ներկայացուցիչ Սերգեյ Բագրատյանը: «Նա երկար տարիներ աշխատել է ՏԻՄ մարմիններում եւ ԱԺ-ում: Վստահ եմ, որ այդ փորձն օգտակար կլինի մեզ»,-Բագրատյանին ներկայացնելով հանձնաժողովականներին` ասաց հանձնաժողովի նախագահ, «Իմ քայլը» դաշինքի պատգամավոր Վարազդատ Կարապետյանը:
Ապա նա անդրադարձավ օրակարգի մյուս հարցին՝ հանձնաժողովի աշխատակարգին: «Որքան էլ որ մեր գործընկերներն ընդդիմադիր կուսակցություններից լինեն, մենք բոլորս իշխանություն ենք՝ օրենսդիր իշխանության ներկայացուցիչներ: Որքան շատ աշխատենք միասին ու համակարգված, այնքան՝ լավ»,-վստահեցրեց «Իմ քայլը» դաշինքի պատգամավորը:
Օրակարգի մյուս հարցը չօգտագործվող հողերի խնդիրն էր, որի առնչությամբ, Վարազդատ Կարապետյանի փոխանցմամբ, ստեղծվում է աշխատանքային խումբ: Կարապետյանը նշեց, որ 200 հազար հեկտար չօգտագործվող հողեր կան, որոնք կազմում են ՀՀ վարելահողերի 45%-ը. «Այն, ինչ քննարկենք, օրենսդրական նախաձեռնության տեսք է ստանալու. հողահարկի մասին օրենքում կամ հողային օրենսգրքում գուցե փոփոխություններ լինեն»:
Վարազդատ Կարապետյանը նշեց, որ իրենց հանձնաժողովից երեք պատգամավոր կմասնակցի նշյալ խնդրով զբաղվող աշխատանքային խմբի քննարկումներին:
Հանձնաժողովի նախագահի տեղակալ ընտրված ԲՀԿ պատգամավոր Սերգեյ Բագրատյանն էլ հավելեց. «Քաղաքացիներից շատ դժգոհություններ կան համայնքների խոշորացման առնչությամբ: Կարծում եմ՝ մենք նոր չափորոշիչներ պետք է մշակենք, որպեսզի դժգոհություններ չունենանք: Մարզպետարանների աշխատանքը եւս նոր չափորոշիչների կարիք ունի: Եկեք դա անվանենք ոչ թե օպտիմալացում, այլ արդյունավետ կառավարման նոր համակարգ: Բացի այդ, առաջնահերթ են գյուղատնտեսության ապահովագրության խնդիրները: Պոչամբարների հարցում եւս շատ անելիքներ ունենք, օրինակ՝ հանքերի շահագործման նոր ընթացակարգ մշակելու առնչությամբ: Հանքարդյունաբերության վիճակն օր օրի ծանրանում է»:
Լուիզա ՍՈՒՔԻԱՍՅԱՆ
