«Ռոբերտ Քոչարյանը որեւէ ցուցմունք չի տվել: Սկզբում նախաքննական մարմինն իրեն անաչառ չի պահել, հետո՝ մեղադրանքը հասկանալի չի եղել, այդ պատճառով չի տվել»,-«Հայելի» մամուլի ակումբում այսօր լրագրողների հետ հանդիպմանն անդրադառնալով որոշ ԶԼՄ-ների տեղեկություններին, թե Սերժ Սարգսյանը ցուցմունք է տվել Ռոբերտ Քոչարյանի դեմ, վերջինս էլ՝ Սարգսյանի, ասաց Մարտի մեկի գործով ՀՀ սահմանադրական կարգը տապալելու համար մեղադրվող ՀՀ երկրորդ նախագահ Ռոբերտ Քոչարյանի շահերի պաշտպան, փաստաբան Հայկ Ալումյանը:
«Ռոբերտ Քոչարյանն առհասարակ ցուցմունք չի տվել եւ առայժմ չի էլ պատրաստվում ցուցմունք տալ»,-տեղեկացրեց նա: Նաեւ նշեց, որ օրերս Վերաքննիչ քրեական դատարանում ելույթի ժամանակ եւս Ռոբերտ Քոչարյանը Սերժ Սարգսյանին չի անդրադարձել:
Հայլ Ալումյանի խոսքով. «Մարտի մեկի գործով Ռոբերտ Քոչարյանին առաջադրված մեղադրանքի թուլացմանը զուգընթաց՝ ԱԱԾ-ն նոր բաներ է փնտրելու, որպեսզի մեղսագրի Ռոբերտ Քոչարյանին, որպեսզի իր «ֆիասկոն» այդքան էլ ցայտուն չլինի»:
Լուիզա ՍՈՒՔԻԱՍՅԱՆ
