Երեկվանից Ֆրանսիայի Վիլեռ լե Նանսի քաղաքի «Մադամ Գրաֆինի» (Galerie Madame De Graffigny) դղյակ- պատկերասրահում բացվել է 9 տարի շարունակ Ֆրանսիայի հենց այդ նույն քաղաքում բնակվող գյումրեցի գեղանկարիչ Արման Թադևոսյանի «Հետքերը ստվերների» խորագրով անհատական ցուցահանդեսը։ Ներկայացված են նրա «Ծնունդ», «Պար», «Թռիչք», «Խաչելություն», «Պիետա» և այլ խորագրերով գեղանկարները։
Համատեղ ցուցադրվում է նաև Արմանի եղբոր՝ զենքերը զարդի վերածող գյումրեցի Արտակ Թադևոսյանի աշխատանքները, որոնք նա ստեղծել է՝ ներշնչվելով իր նկարիչ եղբոր գործերից։ Այս մասին Aravot.am-ի հետ զրույցում տեղեկացրեց Արտակ Թադևոսյանը՝ մեզ տրամադրելով ցուցադրության ուղարկված իր ու եղբոր աշխատանքների լուսանկարները։ Արտակ Թադևոսյանն այս անգամ չի մեկնել ցուցահանդեսի, այլ ուղարկել է գործերը։ Նշենք, որ ցուցահանդեսը տևելու է փետրվարի 7-ից մինչև մարտի 10-ը։
«Ապագայում իմ ստեղծագործական ծրագրերի մեջ կմտնի տարբեր արվեստագետների նկարները նույնպես զարդերի վերածելն, որի նպատակն է զարդասեր հասարակությանը բերել արվեստի պլատֆորմ։ Արդեն համաձայնություն կա Վազգեն Պահլավունու, Աշոտ Աշոտի, Ալեքսեյ Մանուկյանի, Սարգիս Հովհաննիսյանի և մի շարք գյումրեցի նկարիչների հետ։ Նկարիչների ցանկը օր օրի ավելանալու է, առավելագույնս կփորձեմ մեծ թվով նկարիչների ընդգրկել», -ասաց Արտակ Թադևոսյանը։
Նունե ԱՐԵՎՇԱՏՅԱՆ
