Կառավարության կողմից նախապատրաստվում է շատ կարևոր որոշման նախագիծ, որով սահմանվում են «Մատչելի բնակարան զինծառայողներին» պետական աջակցության նպատակային ծրագրի շրջանակներում սպայական կազմի զինծառայողներին բնակարան կամ բնակելի տուն ձեռք բերելու նպատակով մատչելի և արտոնյալ պայմաններով երկարաժամկետ հիփոթեքային վարկավորման կարգը և պայմանները:
Ծրագիրը, մասնավորապես, առաջարկում է 20 տարի ժամկետով արտոնյալ վարկավորման ծրագիր` առավելագույնը 7% տարեկան տոկոսադրույքով, ինչպես նաև պետության կողմից բնակարանի արժեքի 10% կանխավճարի վճարում, տոկոսադրույքի 3%-ի սուբսիդավորում, իսկ անմիջապես կառուցապատողից բնակարան կամ բնակելի տուն ձեռք բերելու դեպքում մնացած 4%-ի վճարումն իրականացվելու է օրենքով սահմանված եկամտային հարկի հետ վերադարձման միջոցով :
Նախատեսվում է, որ ծրագրի շահառուներ կարող են դառնալ պաշտպանության նախարարության, ոստիկանության, ազգային անվտանգության ծառայության և արդարադատության նախարարության քրեակատարողական ծառայության սպայական կազմի զինծառայողները:
Առաջարկում եմ կառավարության որոշման նախագծում կատարել լրացում, և ծրագրի շահառու դարձնել նաև արտակարգ իրավիճակների նախարարության փրկարար ծառայության սպայական կազմի ծառայողներին՝ փրկարար ծառայության համար հատկացնելով յուրաքանչյուր տարվա համար 40 տեղ, նույն կերպ՝ ինչպես առաջարկվում է ոստիկանության և ազգային անվտանգության ծառայության պարագայում:
Փրկարար ծառայությունը ամենօրյա ռեժիմով և պատասխանատվության բարձր զգացումով իրականացնում է բնակչության անվտանգության ապահովմանն ուղղված՝ հաճախ կյանքի և առողջության համար վտանգավոր գործունեություն, և կարծում եմ, վաստակել է այս նպատակային ծրագրից օգտվելու իրավունքը:
Համապատասխան առաջարկը ուղարկում եմ Հայաստանի Հանրապետության վարչապետի աշխատակազմ:
Հայկ ԱՐԱՄՅԱՆ
