Լարսին այլընտրանք ճանապարհի բանակցությունների մասին կառավարությունը չի ուզում բարձրաձայնել՝ գործընթացին չվնասելու համար: Այսօր այս մասին կառավարության արտահերթ նիստից հետո լրագրողների հարցին, թե ինչ նորություն կա Լարսին այլընտրանք ճանապարհից, ասաց տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը:
Նրա ներկայացմամբ՝ բանակցություններ են ընթանում, հայկական կողմը, սակայն, չի ցանկանում մեկնաբանություններ անել. «Բազմիցս հարցը մեզ տրվել է, մենք փորձել ենք չմեկնաբանել եւ հիմա էլ կգնանք չմեկնաբանելու ուղղությամբ: Ես միայն կարող եմ ասել, որ դա շատ կարեւոր պրոյեկտ է ՀՀ-ի համար: Այնուամենայնիվ, որպեսզի մենք բանակցային պրոցեսներին որեւէ կերպ չվնասենք, զերծ ենք մնում որեւէ մեկնաբանությունից՝ հաշվի առնելով, որ դա ոչ թե Հայաստան -Վրաստան կամ Հայաստան-Ռուսաստան երկկողմ սահման է, այլ երկու տարբեր գործընկեր պետությունների սահմանն է: Եվ մենք կուզենայինք հնարավորինս քիչ միջամտել ու մեկնաբանել»,- ասաց նախարարը:
Լուսինե ԲՈՒԴԱՂՅԱՆ
