Հայկական կողմը չի արձագանքել ՀԱՊԿ գլխավոր քարտուղարի պաշտոնում առաջադրված Բելառուսի անվտանգության խորհրդի ղեկավար Ստանիսլավ Զասի հետ հանդիպելու առաջարկին: Այս մասին գրում է «Սպուտնիկի» բելառուսական ծառայությունը:
«Առայժմ գործընթացը որևէ կերպ առաջ չի շարժվում: Ես առաջարկ եմ ուղարկել (հայկական կողմին-խմբ.) և պատրաստ եմ հանդիպել հայկական կողմի համար ցանկացած հարմար ժամանակ, բայց առայժմ պատասխան չեմ ստացել»,- ասել է Ստանիսլավ Զասը:
Զասի խոսքով՝ ՀԱՊԿ մյուս բոլոր երկրները պաշտպանել են իր նշանակումը կազմակերպության գլխավոր քարտուղարի պաշտոնում: Նա նաև ուշադրություն է հրավիրել այն բանի վրա, որ ըստ ՀԱՊԿ կանոնակարգի՝ հնարավորություն կա որոշում կայացնել սահմանափակ կազմով:
«Դա լավագույն տարբերակը չէ: Այդպիսի որոշումները պետք է ընդունվեն փոխհամաձայնությամբ: Դա բնականոն անխափան աշխատանքի գրավականն է: Հույս ունենք, որ շուտով այդպիսի որոշում կընդունվի փոխհամաձայնությամբ»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
