«Պաշտպանության նախարարությունը ակնհայտ անտարբերություն է ցուցաբերում բանակից զորացրված զինծառայողների նկատմամբ: Մեր խնդիրներն այլեւս ոչ ոքի չեն հետաքրքրում: Սահմանին կանգնած զինվորը, տեսնելով նման վերաբերմունք, ինչպե՞ս է շարունակելու ծառայությունը»,-Aravot.am-ի հետ զրույցում ասացին զինվորական ծառայությունն ավարտած զինվորականները: Նրանք հավաքվել էին կառավարության առաջ՝ պահանջելով տեր կանգնել բնակարանով ապահովելու խոստումներին:
Զինծառայությունն ավարտած քաղաքացիները դժգոհ են կառավարության նոր որոշումից, որով ոչ թե բնակարան է տրամադրվելու, այլ՝ գումար, այն էլ մարզերի եւ մայրաքաղաքի զինծառայողների համար այդ գումարի չափն էական տարբերությամբ է լինելու:
«Վարդենիսցու ու երեւանցու միջեւ խտրականություն են դնում: Վարդենիսի զինծառայողին տալիս են 100 տոկոս փոխհատուցում, երեւանցուն՝ 50 տոկոս: Կամ՝ ասում են հող տրամադրենք, տուն կառուցեք, ինչո՞վ կառուցենք, թոշակով ինչպե՞ս կարող ենք տուն կառուցել»,-նշում էին ցույցի մասնակիցները:
Ցոլակ Խաչատրյանի խոսքով, զինծառայողները պահանջում են իրենց բնակարանները եւ կապ չունի մարզից են, թե մայրաքաղաքից:
«Մարդիկ, ծառայության անցնելով, կնքել են պայմանագիր: Այսինքն՝ մենք անցնում ենք աշխատանքային պայմանագրի: Պետությունը՝ որպես գործատու, զինծառայողը՝ աշխատող եւ այսօր մարդիկ պահանջում են պայմանագրով ստանձնած պարտավորությունը կատարել»:
Դավիթ Սոֆիյանի խոսքով՝ իրենց որոշ ընկերներ իրենց իրավունքները վերականգնելու համար դիմել են դատարան:
Զինծառայությունն ավարտած քաղաքացիների համոզմամբ, կառավարությունը բնակարանի տրամադրման պայմաններում փոփոխությունը կատարել է, որպեսզի ավելի մեծ թվով զինծառայողների կարողանա ապահովել, սակայն այդ եղանակով բնակարանի հարցը չի լուծվելու:
Լուսինե ԲՈՒԴԱՂՅԱՆ
