«Շատ երկրներում լաբորատորիաների ֆինանսավորումն իրականացվում է ռեյտինգային ձեւով, մեզ մոտ էլ յուրաքանչյուր գիտաշխատող կհասկանա, թե ինքն ինչ աշխատավարձի է հավակնելու, կամ ինստիտուտը ինչ բյուջեի է հավակնում:
Թվերն այնպիսին են, որ յուրաքանչյուր ինստիտուտ կարող է ինքը դնել եւ իր թվերը հաշվել, թե յուրաքանչյուր գործառույթի համար ինչքան միավոր է հավաքել: Ֆինանսավորման այս տարբերակը շատ նման է մեր առավել ակտիվ գիտնականների կամ թոփ-100 կոչեցյալի մրցույթին:
Այստեղ հնարավոր չէ անարդար բաներ անել, որովհետեւ եթե հիմնարկը տպագրել է 100 հոդված, հնարավոր չէ դա 90 հաշվել: Կամ եթե հղումները ինչ-որ մի թիվ են, դրանք գիտաչափական տվյալներ են, որոնք կարող եք մտնել Thomson Reuters տեղեկատվական կայքից ստանալ: Այսինքն` այնպիսի չափանիշների վրա են հիմնված լինելու գնահատականները, որոնք ստուգման ենթակա են եւ բաց: Սա կբերի ֆինանսների արդար բաշխման»,- «Արմենպրեսում» կայացած ասուլիսում ասաց ՀՀ ԿԳՆ գիտության պետական կոմիտեի նախագահը:
Ապա հավելեց. «Անուններ չեմ ուզում տալ, բայց հիմնարկներ կան, որտեղ 300 մարդ է աշխատում, եւ հիմնարկ կա, որտեղ աշխատում է 80 հոգի: Սակայն այդ 300 հոգանոց հիմնարկի գիտական արդյունքները 3 անգամ քիչ են, քան 80 հոգանոցինը: Մինչեւ հիմա մարդկանց թվաքանակով էր բյուջեն հաշվվում, ինչը ազնիվ չէ»:
Նա շեշտեց, որ 2012-ին կառավարությանը առաջարկ է ներկայացվել ռեյտինգային ֆինանսավորման մասին, սակայն դա չի անցել:
Գոհար ՀԱԿՈԲՅԱՆ
