ԱԺ «Բարգավաճ Հայաստան» եւ «Լուսավոր Հայաստան» խմբակցությունները զրկվել են խորհրդարանական որոշ միջազգային կառույցների եւ վեհաժողովների պատվիրակություններում ընդգրկված լինելու հնարավորությունից: Արդեն երկու օր է՝ ԱԺ խորհրդի նիստերում թեժ քննարկումներ են լինում այս թեմայով:
ԲՀԿ խմբակցության պատգամավոր Նաիրա Զոհրաբյանն այսօր լրագրողների հետ զրույցում հաստատեց այդ տեղեկությունը: Բայց խորհրդի նիստերից այլ մանրամասներ նա հրաժարվեց հրապարակել. «Ես կարծում եմ, քանի որ երեք խմբակցություն կա խորհրդարանում ներկայացված, բոլոր երեք խմբակցությունները պարտադիր պետք է ներկայացված լինեին բոլոր միջազգային վեհաժողովներում ու կառույցներում: «Բարգավաճ Հայաստանը» ներկայացված չէ ՆԱՏՕ-ի խորհրդարանական վեհաժողովում, «Լուսավոր Հայաստանը» ներկայացված չէ Սեւծովյան տնտեսական համագործակցության խորհրդարանական վեհաժողովում: Ցավոք սրտի, փորձեցինք գտնել կոնսենսուս, չստացվեց: Ինչեւէ, կփորձենք այս ֆորմատով աշխատել»:
Լրագրողները հետաքրքրվեցին նաեւ կառավարության ծրագրից, Նաիրա Զոհրաբյանն ասաց, որ իրենց խմբակցությունում ծրագիրը դեռ չի քննարկվել, ուստի, ինքը ձեռնպահ կմնա մեկնաբանություններից:
Այլ մանրամասները`տեսանյութում
Նելլի ԳՐԻԳՈՐՅԱՆ
