Այսօր կայացավ ԱԺ Մարդու իրավունքների պաշտպանության եւ հանրային հարցերի հանձնաժողովի առաջին նիստը: Հանձնաժողովն ունի 10 անդամ: 9 անդամների թեկնածությունն է հաստատված, ԲՀԿ-ից Տիգրան Ստեփանյանի թեկնածությունն այսօր կհաստատվի:
Հանձնաժողովի նախագահի տեղակալ առաջադրելու իրավունքը ըստ Դոնթի բանաձեւի եւ քաղաքական ուժերի համաձայնության, վերապահվել է «Լուսավոր Հայաստանին»: Վերջինս էլ առաջադրել է Անի Սամսոնյանին: Նրան ներկայացրեց հանձնաժողովի նախագահ Նաիրա Զոհրաբյանը. «Գործ ունենք անաչառ գործչի հետ, որի համար կարեւոր է օբյեկտիվությունը»: Այս տպավորությանը տիկին Զոհրաբյանը հանգել է Երեւանի ավագանիում Անի Սամսոնյանի գործունեությունից, հատկապես վերջին ելույթից`«Եկել եմ հարամելու ձեր տոնածառը»:
Ինքը`Անի Սամսոնյանը ուրախ է, որ վերաբացվել է այս հանձնաժողովը: Ասում է՝ թեպետ նախորդ իշխանությունը փորձել է մարդու իրավունքների ոլորտում բարեփոխումներ անել, սակայն, չի հաջողել, քանզի իշխանությունը օգտագործել է իր լեգիտիմ միջամտության իրավունքը: Այլ պատճառներ էլ են եղել: Այն, որ մինչ օրս ՄԻԵԴ-ը Հայաստանից բողոքներ է ընդունում եւ հայցեր է կոմունիկացնում, ըստ Անի Սամսոնյանի, ուղղակի փաստում է, որ Հայաստանում խնդիր կա մարդու իրավունքների ոլորտում: Նա շատ է կարեւորում, որ ընդդիմությանն է տրված այս վերահսկողական գործառույթը, քանզի, ընդդիմությունն ավելի անաչառ կգործի: «Չնայած իմ քննադատական դիրքորոշումներին, բաց եմ եղել համագործակցության համար»,- ասաց նա`հավելելով, որ ակտիվ է աշխատելու եւ արդարացնելու է իր թիմի ակնկալիքները, որն իրեն գործուղել է այս ոլորտում աշխատելու:
Անի Սամսոնյանին հարցեր չտրվեցին: Նա միաձայն ընտրվեց հանձնաժողովի փոխնախագահ:
Նաիրա Զոհրաբյանն էլ հանձնաժողովի անդամներին հորդորեց`հանձնաժողովի աշխատանքները չվերածել ինքնաPR-ի եւ քննարկումները էպատաժային չանել:
Այլ մանրամասները`շուտով տեսանյութում
Նելլի ԳՐԻԳՈՐՅԱՆ
