Տոկիոյի օլիմպիական խաղերի մասնակից ըմբիշների ընտրությունը խիստ է լինելու: Սահմանափակված է, որ յուրաքանչյուր քաշային կարգում լինելու է 16 ըմբիշ: Օլիմպիական խաղերի ուղեգրերը խաղարկվելու են այս տարվա աշխարհի առաջնությունում ու եւս երեք վարկանիշային մրցաշարերում: Դրանցից մեկը լինելու է 2020 թվականի եվրոպական վարկանիշային մրցաշարը, որն ընդունելու հայտ ներկայացրել են հինգ երկրներ: Նրանց թվում նաեւ Ադրբեջանն է:
Aravot.am-ը Հայաստանի հունահռոմեական ըմբշամարտի ազգային հավաքականի գլխավոր մարզիչ Լեւոն Ջուլֆալակյանից հետաքրքրվեց, թե հաշվի առնելով նախորդ տարիների փորձը, ֆեդերացիան ինչ-որ քայլեր ձեռնարկո՞ւմ է: «Մենք միջազգային ֆեդերացիային՝ UWW-ին, արդեն նամակ ենք ուղարկել՝ հորդորելով եվրոպական վարկանիշային այդ մրցաշարն անցկացնող քաղաքի ընտրության ժամանակ Բաքուն բացառել, որովհետեւ Հայաստանի հավաքականը մասնակցելու հետ կապված խնդիրների առջեւ կկանգնի: Միաժամանակ նամակներ ենք ուղարկել եվրոպական տարբեր երկրների ազգային ֆեդերացիաներ՝ նախազգուշացնելով, որ եթե իրենք իրենց հավաքականների կազմում հայ մարզիկ ունենան, ու կարեւոր չէ՝ հունահռոմեական, թե ազատ ոճի, նույնպես խնդիրներ են ունենալու: Մենք նրանց հորդորել ենք, որպեսզի իրենք նույնպես քայլեր ձեռնարկեն Բաքվի ընտրությունը բացառելու համար: Տեսեք, թե Եվրոպայի քանի երկրի ազգային հավաքականներում հայ ըմբիշներ կան՝ Ռուսաստանում, Ֆրանսիայում, Շվեդիայում, Բուլղարիայում, Լեհաստանում, Հոլանդիայում ու էլի այլ երկրներում:
Հիմա խոսքը UWW-ինն է, եւ ժամանակը ամեն ինչ ցույց կտա», – պատասխանեց Լեւոն Ջուլֆալակյանը:
Աշոտ ՀԱԿՈԲՅԱՆ
