Վերաքննիչ քրեական դատարանն այսօր մասնակի բավարարեց Մարտի 1-ի գործով քննչական խմբի նախկին ղեկավար Վահագն Հարությունյանի պաշտպանական կողմի բողոքը, բեկանել կալանավորման որոշումը և գործն ուղարկել առաջին ատյանի դատարան նոր քննության։
«Որոշումը դեռ չենք ստացել, բայց կարծում եմ՝ դատարանը շեշտը դրել է պաշտպանական իրավունքից զրկելու մասով խախտումների վրա, որի մասին պաշտպանական կողմը բարձրաձայնում էր, կարծում եմ՝ այդ պատճառով է, որ մասնակի է բավարարվել, և մյուս հարցերին դատարանը չի էլ անդրադարձել»,-ասաց Հարությունյանի պաշտպան Միհրան Պողոսյանը:
Ըստ նրա՝ դատարանն արդար որոշում է կայացրել և տեղիք չի տվել առաջին ատյանի դատարանի կողմից կատարված ապօրինություններին:
Հիշեցնենք, որ Վահագն Հարությունյանը մեղադրվում է ՀՀ ՔՕ 308–րդ հոդվածի 2–րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով):
Հիշեցնենք նաեւ, որ 2018թ. դեկտեմբերի 30-ին առաջին ատյանի դատարանի դատավոր Արտուշ Գաբրիելյանն առանց պաշտպանական կողմի մասնակցության Վահագն Հարությունյանին երկրորդ անգամ կալանավորելու որոշում էր կայացրել։
Արփինե ՍԻՄՈՆՅԱՆ
