Այսօր կառավարության նիստին Շիրակի մարզպետ նշանակվեց Տիգրան Պետրոսյանը: Նա նիստից հետո լրագրողների հետ ճեպազրույցում անդրադարձավ իր ծրագրերին, թե ինչ է նախատեսվում անել Շիրակում:
«Վարչապետը հստակ հանձնարարական հնչեցրեց՝ որպես առաջնահերթություն, կենտրոնում պահել մարզի սոցիալ-տնտեսական իրավիճակը, եւ որպես այդ իրավիճակի վրա ազդեցություն թողնելու եւ մարզի զարգացումն ապահովելու հիմնական գործիք, ներդրումային ֆոնի բարելավվումն է, նրանք, ովքեր մարզում որեւէ գործառույթ են իրականացնելու, նրանք պետության անմիջական աջակցությունը պետք է զգան »,-ասաց նորանշանակ մարզպետը:
Մարզում նախատեսվող փոփոխությունների եւ առկա խնդիրների լուծման մասին էլ մարզպետն ասաց, որ հանձնաժողով է ստեղծվել, որը պետք է սեղմ ժամկետում ուսումնասիրի իրավիճակն ու հասկանա խնդիրները, եւ հստակ պատկերացնելով խնդիրները, ըստ այդմ էլ դրանց լուծումներ կտրվեն:
Որքա՞ն ժամանակ է հարկավոր ձեզ, որպեսզի վերանա աղետի գոտի հասկացությունը, այս հարցին ի պատասխան՝ մարզպետը փոքրիկ ուղղում արեց՝ «Որքան ժամանակ է մեզ պետք… սա բոլորիս խնդիրն է: Այս պարագայում քաղհասարակությունը, պետությունը, անհատները պետք է մոբիլիզացնի ռեսուրսները: Վճռական ենք տրամադրված»:
Մանրամասն՝ տեսանյութում
Նելլի ԲԱԲԱՅԱՆ
