Այսօր կառավարության նիստից հետո լրագրողների հետ ճեպազրույցում կրթության եւ գիտության նախարար Արայիկ Հարությունյանն անդրադարձավ կառավարության ծրագրի՝ իր կողմից ղեկավարվող ոլորտի հատվածին: Այսօր կառավարության ծրագրին հավանություն չտվեցին. շտկելու դրույթներ կային:
Ծրագրի՝ կրթության եւ գիտության ոլորտի դրույթի մասին նախարարն ասաց, որ ծրագիրը հիմնված է «Իմ քայլը» դաշինքի ծրագրի վրա. «Հիմնական նպատակները մի քանիսն են՝ փոխել դպրոցի բովանդակությունը: Մեծ շեշտադրում ենք արել նախակրթական ոլորտի զարգացման վրա: Բարձրագույն կրթության եւ գիտության ոլորտում ակնկալում ենք, որ գիտության վերադարձը բուհական համակարգ կարող է շեշտակի փոխել իրավիճակը: Խոսել ենք ներառական կրթության եւ դրա արդյունավետության մասին»:
Դպրոցների սեյսմակայունության մասին հարցին ի պատասխան՝ Հարությունյանն ասաց, որ դա այլ գերատեսչության ներքո է. «Մենք ունենք 400-ից ավելի դպրոցներ, որոնք այս կամ այն չափով խնդիրներ ունեն: Հիմա վարկային ծրագիր ենք իրականացնում: Պետք է ասեմ, որ կրթության եւ գիտության նախարարության մի շարք ավագ դպրոցներ առաջիկա 2 տարիներին նույնպես կվերանորոգվեն եւ կհիմնանորոգվեն եւ այնտեղ նույնպես սեյսմիկ անվտանգության խնդիրներ են լուծվելու»:
Մանրամասն՝ տեսանյութում
Նելլի ԲԱԲԱՅԱՆ
