«Նիկոլ Փաշինյանի ազգականը աշխատում է Սամվել Ալեքսանյանի համակարգում` որպես կադրերի բաժնի վարիչ, ու Սամվել Ալեքսանյանի հարաբերությունները Նիկոլ Փաշինյանի հետ շոկոլադային են: Բա ո՞ւր է Գագիկ Խաչատրյանը, ո՞ւր է այն ստվերը, որն ասում էին: Մենք տեսնում ենք, որ որևէ լուրջ փոփոխություն չի եղել»,- այսօր «Հայելի» ակումբում ասաց «Ազգային համաձայնություն» կուսակցության նախագահ Արամ Հարությունյանը:
Ըստ նրա՝ տնտեսական հեղափոխություն այդպես էլ չեղավ, չեն եղել ոլորտում բարեփոխումներ եւ դժվար էլ լինեն:
Սոցիոլոգ Ահարոն Ադիբեկյանն էլ ասաց՝ տնտեսական հեղափոխության մասին խոսելը դեռ վաղ է. «Մեզ մոտ դրսից գալիս էր 3 մլրդ դոլար, հիմա 3 անգամ նվազել է: Այդ 3 մլրդ դոլարը պահում էր մեր միջին ու փոքր բիզնեսը: Մի հատ շրջեք Երևանի փողոցներով, թե ինչքան կրպակ ու փոքր խանութ է փակվել, գնորդ չկա»:
«Իմ քայլը» խմբակցության պատգամավոր Հովիկ Աղազարյանն էլ հակադարձեց Արամ Հարությունյանի՝ կոռուպցիայի վերաբերյալ հայտնած մտքերին. «Շատերը դեռ սովոր չեն ապրել նոր արժեհամակարգում և իներցիայով գնում են այդ ճանապարհով: Շատերն էլ չեն ուզում ապրել այդ արժեհամակարգով և իրենց գործունեությամբ փորձում են նոր իշխանությունների նկատմամբ ժողովրդին հակակրանք սերմանել»:
Անդրադառնալով «Մարտի մեկի» գործին՝ Արամ Հարությունյանը կարծիք հայտնեց, որ գործը խեղաթյուրվում է, խաբում են զոհերի հարազատներին։ «Մարտի 1»-ի գործով մեղադրյալ ՀՀ երկրորդ նախագահ Ռոբերտ Քոչարյանի հարազատներին էլ են, ըստ նրա, խաբում. «Չի կարելի էդպիսի ստոր ձեւով վարվել հարազատների հետ, չի կարելի նշանակել մեղադրյալ եւ ասել՝ ինքն ա։ Ինչի՞ չեն գնում Շերիֆի հետեւից, ներքին զորքերի հրամանատարն էր, կարծես թե ոստիկանությունը թիթեռ է նկարել պատին… «Մարտի մեկը մեր բոլորի ցավն է՝ բացառությամբ Լեւոն Տեր–Պետրոսյանի, որովհետեւ ինքն էդ գիշեր ամենահանգիստն է եղել եւ վերջապես ստացավ էն, ինչ ուզում էր»:
Արփինե ՍԻՄՈՆՅԱՆ
