«Քաղաքական օրակարգում շատ ակտիվ գործընթացներ են գնում՝ և ֆեյքային, և իրական, նաև տեխնոլոգիաներ են օգտագործվում, որպեսզի շեղեն իրական գործընթացներից՝ սկսած օրհներգներից, կոկորդիլոսներից, պարգևավճարներից և այլն»,- լրագրողների հետ հանդիպման ժամանակ ասաց քաղտեխնոլոգ Վիգեն Հակոբյանը:
Օրհներգի փոփոխության մասին խոսելիս բանախոսը նկատեց, որ դա այսօրվա թեմա չէ, եթե նույնիսկ համարենք, որ կա նման խնդիր. «Հետաքրքիր մի երևույթ կա. ամեն իշխանափոխությունից հետո այս հարցը ծագում է: Տվյալ պարագայում ես համաձայն եմ այն կարծիքների հետ, որ սա մի թեմա է, որով փորձում են շեղել հասարակության ուշադրությունն ավելի լուրջ, գուցե ավելի հրատապ հարցերից: Մենք հիմա մի փուլի մեջ ենք, երբ տարբեր մանիպուլյատիվ տեխնոլոգիաներ են օգտագործվում. օրհներգի փոփոխության թեման դրանցից մեկն է: Լավ է, որ հասարակությունը կամաց-կամաց սկսում է թացը չորից տարբերել»:
Ռոզա ՀԱԿՈԲՅԱՆ
