Երեւանից Բալյանների ընտանիքը 3-րդ տեղն է գրավել «Մարզական ընտանիք» միջազգային փառատոնում: Այսօր նրանց ընդունեց եւ Սպորտի եւ երիտասարդության հարցերի նախարարության շնորհակալագիր հանձնեց նախարարի պաշտոնակատար Գաբրիել Ղազարյանը: Նա նշեց, որ այս հաջողության մեջ նշանակալի ներդրում է ունեցել նաեւ սպորտի պետական կառույցը, որը մեկուկես տասնամյակ կազմակերպել է «Լավագույն մարզական ընտանիք» հանրապետական մրցույթը, ինչն էլ այսպիսի ձեռքբերման հիմքն է հանդիսացել:
Նախարարի պաշտոնակատարը նաեւ հույս հայտնեց, որ առողջ ապրելակերպն ու ֆիզիկական կուլտուրան մուտք կգործեն ավելի շատ թվով ընտանիքներ եւ հաջորդ տարիներին Հայաստանի դրոշը կծածանվի ավելի բարձր:
«Մարզական ընտանիք» միջազգային փառատոնին մասնակցել է նաեւ Մովսիսյանների ընտանիքը՝ Կապանից, որը Ռուսաստանի, Մոլդովայի, Ուզբեկստանի, Ադրբեջանի եւ Ուկրաինայի 19 ընտանիքների մեջ միջին տեղեր է զբաղեցրել:
Աշոտ ՀԱԿՈԲՅԱՆ
