Հայտնաբերվել է պատճառը, թե ինչու այս տարիների ընթացքում նախկին իշխանությունները չեն կարողացել երկիրը զարգացնել։ Պատճառը օրհներգն է։ Հիմա մեր նոր իշխանավորները սկսում են ամենակարևորից ու ամենահրատապից՝ փոխել օրհներգը, քանզի այն, ինչպես իրենք են պնդում, պարզունակ է, թևեր չի տալիս, խեղճ է ու թշվառ։ Մենք էլ ասում էինք՝ ինչու Հայաստանի տնտեսությունը չի զարգանում, ներդրումներ չեն լինում, փաստորեն, մեղավորը մեր օրհներգն է, ներդրողներին վախեցնում, վանում է։ Այ, եթե մի խրոխտ, առնական, հեղափոխական «հիմն» լինի, «գըմփ-գըմփ-հու»-ի հանգույն, տես՝ ի՜նչ փողեր է, որ Հայաստան կգան, Փաշինյանը կասեր՝ ճամպրուկները պատրաստ, հերթի մեջ են։ Բա տնտեսությու՜նը, ոտք կառնի ու կարող է անգամ վագրային թռիչք էլ արձանագրել, այ, կներեք, տնտեսական բում։ Չլինի՞ Հայաստանի նոր հիմնի գաղափարից ամենաշատը ոգևորվել էին ՊԵԿ-ում, իրենք իրենց հո չէի՜ն պարգևատրել՝ հավանաբար մտածելով` նոր հիմնը շուտով հարկային մուտքերն սպասվածից տասն անգամ ավելի շատ է ապահովելու։ Իսկ եթե այս ամենին գումարենք նաև մեր դրոշի վրա խաչ ավելացնելու ալենսիմոնյանական յուրահատուկ գաղափարը, օ՜, նվազագույնը Սինգապուրի հրաշքը կկրկնվի Հայաստանում։
ՈՒրեմն խորհրդարանի 88-հոգանոց իշխանությունը, որ սիրում է ԱԺ-ն սեփական գրասենյակի տեղ ծառայեցնել, որոշել է օրենսդրական աշխատանքն սկսել երկրի պետական օրհներգը փոխելով։ Գաղափարի հեղինակն էլ ոչ թե շարքային պատգամավոր է, այլ ԱԺ փոխխոսնակը, որի համար երկրի ամենամեծ խնդիրը օրհներգն է, այլապես խորհրդարանի «բեմելը» լրիվ այլ հարցով կսկսվեր։ Սա խոսում է այն մասին, որ ոչ միայն կառավարման տարբեր ոլորտներում չկան հայեցակարգային մոտեցում, մշակված օրակարգ, այլև խորհրդարանում։ Այսքան պատգամավոր բերել, լցրել եք խորհրդարան, որ օրենսդրական հստակ նախագծերով հանդես գա՞ն, թե՞ ում մտքին ինչ բրթի, փորձի առաջ տանել։ Այստեղ էլ առաջնորդվում են իներցիայով։ Կառավարությունում` իներցիայով, խորհրդարանում` նույնը, դատական համակարգի մասին էլ չխոսենք։ Բա ու՞ր է հեղափոխությունը, եթե ամեն ինչ իներցիայով է։
Հոդվածն ամբողջությամբ՝ «Իրատես» թերթի այսօրվա համարում:
