«Հետքը» հրապարակել էր, որ ՀՀ երրորդ նախագահ Սերժ Սարգսյանը Մարտի 1-ի գործի շրջանակներում վկայի կարգավիճակով հարցաքննվել է: Մեր աղբյուրները եւս հաստատեցին այդ տեղեկատվությունը: Սերժ Սարգսյանը հարցաքննվել է փետրվարի 1-ին, հարցաքննությունը տեւել է 5-6 ժամ: ՀՔԾ-ից այս տեղեկատվությունը ոչ հաստատում են, ոչ հերքում, ասում են՝ «չենք մեկնաբանում»:
Երկրորդ նախագահ Ռոբերտ Քոչարյանի պաշտպան Հայկ Ալումյանն այս առնչությամբ ասաց, որ ինքն էլ ԶԼՄ-ներից է տեղեկացել Սերժ Սարգսյանի հարցաքննության մասին: Քիչ առաջ դատարանում դատախազության ՀԿԳ քննության նկատմամբ հսկողության վարչության պետ Վահագն Մուրադյանը, երբ լրագրողները փորձեցին ճշտել տեղեկությունը ու հարցնում էին՝ ասեք՝ այո՞, թե՞ ոչ, նույնպես բազմանշանակ ժպտաց ու չցանկացավ որեւէ բան ասել՝ մտնելով նիստերի դահլիճ:
Ավելի ուշ Հայկ Ալումյանը լրագրողների հետ զրույցում ասաց. «Բացարձակապես տեղյակ չեմ, որ ինքը հարցաքննվել է կամ չի հարցաքննվել, մեծ հաշվով դա մեզ հետաքրքիր էլ չի»: Ալումյանն ասաց, որ այն ցուցմունքները, որոնք քննիչը բերել է դատարան, այնտեղից պարզ է դառնում, որ սպայական կազմից բավականին բարձրաստիճան մարդիկ ցուցմունք են տվել, հարցաքննվել են:
Նա ասաց, որ Մանվել Գրիգորյանի ցուցմունքն այս գործով չի տեսել: Հարցին՝ Սերժ Սարգսյանը կարո՞ղ է որեւէ արժեքավոր տեղեկություն տալ, որը կազդի գործի ընթացքի վրա՝ Ալումյանը պատասխանեց. «Սերժ Սարգսյանի հետ կապված որեւէ բան ասել ձեզ չեմ կարող: Սերժ Սարգսյանի հետ որեւէ առնչություն չունեմ: Եթե անգամ գործով ցուցմունք է տվել, ես այն չեմ տեսել»:
Հիշեցնենք, որ Սարգսյանը 2008թ. մարտին Հայաստանի վարչապետն էր, եւ փետրվարին տեղի ունեցած ընտրությունների արդյունքների համաձայն՝ ընտրվել էր Հայաստանի նախագահ: Իսկ առաջին նախագահ Լեւոն Տեր-Պետրոսյանն ու նրա կողմնակիցները չէին ընդունում այդ ընտրությունների արդյունքները:
Հռիփսիմե ՋԵԲԵՋՅԱՆ
