Այսօր՝ փետրվարի 4-ին, Տավուշի մարզի առաջին ատյանի դատարանում Բերդի նստավայրում կայացել է Տավուշի մարզի Այրում քաղաքի բնակիչ, 1937թ. ծնված Ռ. Թ.-ի դատավարության 2-րդ նիստը: Այն հետաձգվել է: Ռ. Թ.-ին մեղադրանք է առաջադրվել այն բանի համար, որ նա 2018թ. նոյեմբերի 23-ին, ժամը 09.15-ի սահմաններում, Այրում քաղաքի Թումանյան փողոցում կենցաղային հարցերի շուրջ ծագած վիճաբանության ժամանակ, իր հասցեին վիրավորական արտահայտություններ հնչեցնելու պատճառով վիճել է իր հարեւանուհու՝ 1935թ. ծնված կնոջ հետ, որի ընթացքում շուրջ 5 րոպե դիտավորությամբ ձեռքերով եւ ոտքերով հարվածներ է հասցրել վերջինիս մարմնի տարբեր հատվածներին՝ պատճառելով առողջության միջին ծանրության մարմնական վնասվածք:
Տարեց տղամարդուն մեղադրանք է առաջադրվել ՀՀ քրեական օրենսգրքի 113 հոդվածի 1-ին մասով («Դիտավորությամբ առողջությանը միջին ծանրության վնաս պատճառելը»): Նրա նկատմամբ խափանման միջոց է ընտրվել չհեռանալու մասին ստորագրությունը:
Ոսկան ՍԱՐԳՍՅԱՆ
