Եթե հասարակական կարծիքը դրական լինի, այս տարի Հայաստանում կծնվեն առաջին նեղոսյան կոկորդիլոսները:
Այսօր այս մասին ասաց ՀՀ Արարատի մարզի Դաշտավան գյուղում կոկորդիլոսաբուծարան հիմնելու մտադրություն ունեցող «Արմոն» ընկերության հիմնադիր, երկրաբան Խաչատուր Սարգսյանը:
Պարոն Սարգսյանի խոսքով, եթե հասարակական կարծիքն այսպես բացասական լինի, ներդրողները կհրաժարվեն ծրագրից: Գործարարի համար հասկանալի չէ՝ինչո՞ւ են 31 կետից բաղկացած ներդրումային ծրագրի հենց մեկ՝ կոկորդիլոսաբուծության կետը վերցրել ու դրանով թիրախավորել Արարատի մարզպետին:
Նրա խոսքով, մարզպետն այդ ծրագրի հետ ընդհանրապես կապ չունի եւ միայն ուզում է մարզի համար լավ բան անել, աշխատատեղեր հիմնել: Ներդրումային ծրագրով նախատեսված է հանգստի գոտի, խաղահրապարակ, ալիքներով լողավազան եւ այլն, իսկ կոկորդիլոսաբուծարանը ժամանցի վայրի գրավչությունը բարձրացնելու նպատակով է բացվում, որպեսզի, ասենք, զբոսաշրջիկներին գրավեն որպես նորամուծություն:
«Մարզպետն ամեն ինչ փորձում է անի, որ ծրագիրն իրականացվի իր մարզի տարածքում, որ իր համայնքի քաղաքացիներն աշխատանք ունենան, բայց մարզպետը չկա ծրագրի մեջ, դա սեփական ծրագիր է, մարզպետին են թիրախավորել եւ քննադատում են ծրագիրը, դա լավ չի»:
Ընկերության հիմնադիրն ասում է՝ իրենք ոչ մի խնդիր չունեն, ոչ օրենքի դաշտում, ոչ՝ բիզնեսի, պարզապես ապշած են արձագանքներից, որոնք հնչում են՝ առանց ներդրումային ծրագիրն ուսումնասիրելու: Նրա խոսքով, եթե այսպես շարունակվի ներդրողները, որոնք 20 երկրներից են, կհրաժարվեն ներդրումներից:
Այս ծրագրի իրագործման համար նախատեսված է 10 միլիոն դոլարի ներդրում: Ինչպես ընկերության հիմնադիրն ասաց, ժամանցի գոտին պատրաստ կլինի հինգ տարվա ընթացքում:
Ըստ պարոն Սարգսյանի, կոկորդիլոսն իր էությամբ, շատ հետաքրքիր կենդանի է եւ մեր երկրում կան այդ կենդանուն բուծելու նպաստավոր պայմաններ՝ չնայած, որ ընկերության համար ռիսկերը շատ բարձր են. «Ռիսկային տեսակետից մեր ծրագրի ամենաթույլ տեղն է կոկորդիլոսաբուծարանը: 400 դոլարով ձուն ենք գնում, ճանապարհին ջարդվեց կկորցնենք: Բայց մենք գնում ենք այդ ռիսկին, քանի որ դա մարդկանց գրավելու միջոց է»:
Խաչատուր Սարգսյանի խոսքով. «Սա բիզնես է, սա սիրո խոստում չէ, փող ես դնում, պետք է կարողանաս փողը հետ բերել: Փող շատ կա. լավ ծրագիր կառաջարկեք՝ մարդիկ կգան, ոչ ոք չի գալիս Հայաստանում գործարան ստեղծի, որովհետեւ երկարաժամկետ ծրագրեր են, մինչեւ բիզնեսն արդյունք կտա, տեխնոլոգիաներն են հնանում»:
Ծրագիրն իրագործվելու դեպքում սոցիալական մի շարք խմբերի համար մուտքն անվճար կլինի:
Բուծած կոկորդիլոսների միսը, կաշին ու ոսկորները կարտահանեն: Կենդանի կոկորդիլոս էլ են ներկրելո՞ւ, պարոն Խաչատրյանն ասաց, որ ունեն պլան «Բ», որի մասին, առայժմ չեն ուզում խոսել:
Լուսինե ԲՈՒԴԱՂՅԱՆ
