Արարատի մարզի Մրգավետ համայնքի դպրոցի կառավարման խորհրդի նախագահ Լուսինե Արշակյանը փետրվարի 4-ին «Հայելի» ակումբում հայտարարեց, որ իրենց դպրոցում տեղի է ունեցել տնօրենի մրցույթ, եւ ընտրվել է մարզպետ Գարիկ Սարգսյանի թեկնածուն, թեեւ դպրոցն ուներ իր նախընտրած թեկնածուն` դպրոցի երկարամյա ուսուցիչ Հասմիկ Սիմոնյանը: Դպրոցի նախկին տնօրեն Վրեժ Զոհրաբյանը կենսաթոշակի է անցել:
Նաեւ նշեց, որ չի բացառվում՝ այս ընտրությանը հետեւեն ազատման դիմումներ, նաեւ իրեն ստիպեն աշխատանքից ազատման դիմում գրել, քանի որ համարձակվել է բարձրաձայնել խնդրի մասին:
«Տեղի է ունեցել դպրոցի տնօրենի ընտրություն՝ կառավարման խորհրդի 8 անդամների ներկայությամբ, եւ իրավաբանորեն ամբողջ ընթացակարգը կատարվել է ճշգրտությամբ` օրենքի տառին համապատասխան, պահպանվել են բոլոր կետերը: Ես վարել եմ նիստը, ժամանակ է տրվել, որ հավասար պայմաններում 4 թեկնածուներն էլ` Արեւիկ Թարվերդյանը, Գայանե Աբրահամյանը, Գոհար Սահակյանը եւ Հասմիկ Սիմոնյանը ներկայացնեն դպրոցի զարգացման իրենց ծրագրերը»,- ասում է կառավարման խորհրդի նախագահը: Բայց նաեւ շեշտում, որ այդ օրինականության տակ այլ ենթատեքստ կա:
Մանրամասն` տեսանյութում
Նրա խոսքերով, դպրոցի տնօրեն ընտրվում է կառավարման խորհրդի 8 անդամների ընտրության արդյունքում, եւ ընտրությունը վավեր է համարվում, եթե խորհրդի 5 անդամ քվեարկել է մեկ թեկնածուի օգտին, իսկ եթե ձայները հավասար են բաշխվում, տնօրեն է ընտրում փոխվարչապետը:
Լուսինե Արշակյանն ասում է, որ Մրգավետի դպրոցի տնօրենի ընտրությունը նախապատմություն ունի: «Դեռեւս նոյեմբեր ամսից, երբ Հայաստանի Հանրապետությունը պատրաստվում էր ԱԺ ընտրություններին, բոլոր համայնքներում տեղակայվում էին շտաբներ: Ինչ վերաբերում է Մրգավետին, «Իմ քայլը» դաշինքի շտաբը տեղակայված էր թեկնածու, հավակնորդ Արեւիկ Թարվերդյանի բակում, եւ շտաբի պետ էր ընտրված ԿԳ նախարարության կողմից ներկայացուցիչ Մհեր Գեւորգյանը»,-շեշտում է կառավարման խորհրդի նախագահը:
Հավելում է, որ նոյեմբերին մարզպետարանը փոխել է ներկայացուցչին, փոխվել է նաեւ ԿԳ նախարարության ներկայացուցիչը, ընդ որում՝ ԿԳ ներկայացուցիչ է դարձել Մհեր Գեւորգյանը, որը նոյեմբեր-դեկտեմբեր ամիսներին եղել է Մրգավետ համայնքում «Իմ քայլը» դաշինքի շտաբի պետ:
Մանրամասն` տեսանյութում
«Փոփոխությունների արդյունքում Պողոսյան Հովհաննեսը կառավարման խորհրդի անդամ դարձավ դպրոցում համայնքի կողմից, իսկ Արեւիկ Թարվերդյանը նրա հարսն է: Մի փոքրիկ գյուղում, որի դպրոցն ունի 336 աշակերտ, արդյոք պատահականությո՞ւն էր, որ նախկին տնօրենի թոշակի գնալուց հետո նոյեմբերի առաջին տասնօրյակում լիազոր մարմինն արագ փոխեց իր անդամներին»,- հայտարարում է կառավարման խորհրդի նախագահը, պնդում, որ ոմանք ուղղակի ներմուծվել են դպրոցի կառավարման խորհուրդ՝ անգամ չունենալով բարձրագույն կրթություն եւ առնչություն կրթության ոլորտի հետ:
Մանրամասն` տեսանյութում
Լուսինե Արշակյանն ասում է, որ փաստորեն կառավարման խորհրդի անդամներին փոխել, հետո նոր հայտարարել են դպրոցի տնօրենի թափուր տեղի համար մրցույթը: Նրա ձեւակերպմամբ, դեռեւս նոյեմբեր ամսից է պլանավորված եղել Արեւիկ Թարվերդյանի տնօրեն դառնալը, անգամ ասեկոսեներ են եղել, որ հենց նա է ընտրվելու: Կառավարման խորհրդի նախագահը պնդում է, որ գործընթացի իրականացմանը նախորդել են զանգեր ու ցուցումներ «վերեւից»:
Մանրամասն` տեսանյութում
«Չէի ուզենա, որ Արարատի մարզում շարունակվեին դպրոցի տնօրենների ուղղորդված, սլաքավորված ընտրությունները, պլանավորված ընտրություններ»,-հայտարարեց բանախոսը: Հավելեց, որ Արարատի թիվ 1 դպրոցն արդեն տեւական ժամանակ չունի տնօրեն, եւ այնտեղ նույնպես վիճահարույց բաներ կան. «Խոսակցություններ կան, որ Ավշարի դպրոցում մարտի 1-ին կայանալու է տնօրենի ընտրություն, սակայն գաղտնի են պահվում թեկնածուները: Կա խոսակցություն, որ հնարավոր է դպրոցի տնօրեն ընտրվի Գարիկ Սարգսյանի քեռու հարսը»,-ասաց Լուսինե Արշակյանը:
Մանրամասն` տեսանյութում
Գոհար ՀԱԿՈԲՅԱՆ
