Շտապ փոփոխություններ են պետք, որ երկրի նախագահը, պատասխանելով Փաշինյանի եւ Ալիեւի հանդիպման մասին հարցին, չասի՝ ինքը գոհ է իր ներկայիս լիազորություններից. Հովհաննես Մարգարյան
«Փոխենք միասին» նախաձեռնության անդամ, ՕԵԿ նախկին պատգամավոր Հովհաննես Մարգարյանը դժգոհում է՝ Շիրակի մարզում հրաժարվել են տարածք տրամադրել իրենց գործունեության համար: «Փոխենք միասին» նախաձեռնության անդամները ստորագրահավաք են սկսել Սահմանադրության դրույթների փոփոխության համար, ինչի համար էլ տարածքը պետք է եկել:
«Մենք որոշեցինք ստորագրահավաքը Գյումրիից սկսել: Տեղական իշխանություններին դիմելով՝ մենք ակնկալում էինք ստորագրությունները հավաքելու համար համապատասխան տարածք ստանալ: Դա նախատեսված է Սահմանադրությամբ », -այսօր «Հայացք» ակումբում ասաց Հովհաննես Մարգարյանը:
Ըստ նրա՝ սահմանադրական բարեփոխումներ են անհրաժեշտ, որոնց արդյունքում կվերականգնվեն այն դրույթները, որոնց համաձայն պետության ղեկավարը կհամարվի անվտանգության, տարածքային ամբողջականության եւ անկախության երաշխավորը. «Հարկավոր է մեծացնել նախագահի դերը՝ վարչապետին հակակշիռ ստեղծելու համար: Շտապ փոփոխություններ պետք է կատարել Սահմանադրության մեջ, որ երկրի նախագահը, պատասխանելով Փաշինյանի եւ Ալիեւի հանդիպման մասին հարցին, չասի, որ ինքը գոհ է իր ներկայիս լիազորություններից: Բացի դրանից, անհրաժեշտ է դրույթ մտցնել, որը թույլ կտա երկրի ղեկավարին հետ կանչելու մեխանիզմներ ստեղծել»:
Արփինե ՍԻՄՈՆՅԱՆ
