Հունվարի 30-ին ՀՀ Ազգային ժողովի նախագահ Արարատ Միրզոյանը սոցցանցի իր էջում մի շարք հարցեր էր մեկնաբանել՝ այդ թվում տեղեկացնելով, որ տեղափոխվելու է բնակվելու կառավարական ամառանոցում:
Aravot.am-ն Արարատ Միրզոյանի օգնական Վահան Կոստանյանից հետաքրքրվեց՝ կառավարական ամառանոց տեղափոխվելն օրենքո՞վ է սահմանված: «Այո»,-պատասխանեց Վահան Կոստանյանը:
Հետաքրքրվեցինք նաեւ, թե այդ դեպքում ԱԺ նախկին՝ ՀՀԿ-ական նախագահ Գալուստ Սահակյանն ինչո՞ւ չէր բնակվում կառավարական ամառանոցում:
«Կարծեմ՝ իրենք են հրաժարվել: Իսկ Արարատ Միրզոյանի պարագայում իր բնակության վայրում անվտանգության աշխատակիցների համար ավելորդ բարդություններ են ստեղծվում, ուստի նպատակահարմար է կառավարական ամառանոց տեղափոխվելը»,-նշեց Վահան Կոստանյանը:
Հավելենք, որ 2014թ.-ի հարցազրույցներից մեկում ԱԺ այդ ժամանակվա նախագահ Գալուստ Սահակյանն ասել էր, որ եթե անհրաժեշտ չլինի՝ չի տեղափոխվի կառավարական ամառանոց, քանի որ իրեն ավելի հարմար է իր տանը բնակվել:
Լուիզա ՍՈՒՔԻԱՍՅԱՆ
