Նախատեսվում է կանոնադրության մեջ փոփոխություն, որի համաձայն՝ կենդանաբանական այգին կունենա կառավարման խորհուրդ, որը բաղկացած կլինի 11 անդամից, 2-ը կլինեն կենդանաբանական այգու աշխատակիցներ, մնացածը հասարակական սեկտորից:
Կենդանաբանական այգու տնօրեն Ռուբեն Խաչատրյանի լիազորությունները ժամանակավորապես կասեցնելու պահանջով բողոքի ցույցերը վերսկսվել են: Այգու նախկին, ներկա աշխատակիցները մի խումբ կենդանասերների հետ այսօր բողոքի ցույց անցկացրին քաղաքապետարանի դիմաց:
Կենդանասերների նախաձեռնող խմբի համակարգող Արմեն Մրշատյանը լրագրողներին ասաց, որ չնայած իրենց պահանջները՝ կենդանաբանական այգու հանձնաժողովի աշխատանքներում իրենց ներգրավելու վերաբերյալ, անտեսվում են, Երևանի քաղաքապետարանը չի ձեռնարկում միջոցներ այգու խախտումները հայտնաբերելու ուղղությամբ, իսկ Ռուբեն Խաչատրյանը շարունակում է հաշվի չառնել կենդանասերների դիտարկումները և այգու աշխատակիցներին անհիմն հեռացնում է աշխատանքից:
«Եթե մեր պահանջներն արձագանք չգտնեն, և շարունակեն մեզ անտեսել, մեր ցույցերը կդառնան ամենօրյա»,-ասաց նա:
Նրա խոսքով, իրենք պահանջում են Երևանի կենդանաբանական այգու տնօրենի տեղի համար անցկացվի մրցույթ և թափուր տեղի համար թեկնածուներ առաջադրվելու հնարավորություն տրվի:
Քաղաքապետարանի դիմաց ցուցարարներին այսօր մոտեցավ քաղաքապետի խոսնակ Հակոբ Կարապետյանը, առաջարկեց Երևանի քաղաքապետարանի մշակույթի վարչության պետ Գոշ Սարգսյանի հետ հանդիպում:
Հանդիպման ժամանակ Գոշ Սարգսյանը հայտնեց, որ քաղաքապետի կարգադրությամբ ստեղծվել է աշխատանքային խումբ, առաջարկություններն ուսումնասիրում են. «Դրանք լուրջ ուսումնասիրության կարիք ունեն: Չի լինելու որևէ հարց, որի հստակ պատասխանը չլինի, դա լինի իրավական, ֆինանսական, թե բոլոր մյուս առումներով»:
Քաղաքապետի մեկ այլ կարգադրությամբ, ստեղծվել է մասնագիտական հանձնախումբ և աուդիտի ու քաղաքապետարանի վերահսկողության վարչությունը ուսումնասիրություններ է կատարել այգում, որը երկու օր առաջ է ավարտվել՝ ընդգրկելով 2016-2018-ը, եզրակացությունը կհրապարակվի առաջիկայում:
Նախատեսվում է կանոնադրության մեջ փոփոխություն, որի համաձայն՝ կենդանաբանական այգին կունենա կառավարման խորհուրդ, որը բաղկացած կլինի 11 անդամից, 2-ը կլինեն կենդանաբանական այգու աշխատակիցներ, մնացածը հասարակական սեկտորից: Այս նախաձեռնությունը դեռ պետք է ավագանու անդամների քննարկմանը ներկայացվի:
Նա վստահեցրեց նաեւ, որ իրենք պաշտպանում են այգու շահերը եւ խորհուրդ տվեց մի քիչ սպասել հարցի լուծմանը. «Ուղղակի պետք է պարզ ճշմարտություն հասկանաք, 100-ավոր նամակներ են, և դրանց հստակ պատասխանի համար անհրաժեշտ է ժամանակ»:
Արփինե ՍԻՄՈՆՅԱՆ
