«Այս դրոշները հերթական անգամ եկան ասելու, որ պատերազմը շարունակվում է, 1915 թվականի ցեղասպանությունը սկսվել, բայց չի ավարտվել: Մենք չպետք է անակնկալի գանք, պետք է կարողանանք ամեն արարք պատժելի դարձնել, որ իրենց համար դաս լինի»,- այսօր «Տեսակետ» ակումբում նման կարծիք հայտնեց չարենցագետ Դավիթ Գասպարյանը՝ անդրադառնալով Լոս Անջելեսի հայկական դպրոցների պատերին թուրքական դրոշներ փակցնելու դեպքին :
Հասարակական գործիչ Ազատ Արշակյանն էլ ասաց՝ անկախ նրանից ովքեր են հեղինակները, ինչ ուժեր են կանգնած այդ ակցիայի հետեւում, պետք է այն դիտվի որպես սթափվելու գործընթաց. «Որպես ՀՀ քաղաքացիներ՝ խնդիր դնենք՝ արդյոք ճիշտ է այն օրակարգը, որ ունենք ՀՀ-Թուրքիա հարաբերություններում՝ առանց պայմանների հաշտեցում: Կարծում եմ՝ առանց պայմաններ ասելով նշանակում է նրանց պայմաններով հաշտեցում, որովհետեւ կա Կարսի պայմանագիրը, կա մոսկովյան կոնֆերանսի պակտը… դրանք բոլորը նրանց պայմաններն են, մեր պայմաններով պետք է սկսենք հարաբերություններ»:
Հոգեբան Սամվել Խուդոյանն էլ ասաց՝ թուրքական դրոշներ փակցնելու նպատակը վիրավորելն է եղել: Նրա մեկնաբանմամբ, թուրքական դրոշը երկրի խորհրդանիշն է, որով դրոշը դպրոցի պատերին փակցնողները հաստատում են՝ էս տարածքը իրենցն է. «Եթե շրջեք Արեւմտյան Հայաստանով, ամեն սարի վրա իրենց դրոշն է, դա հոգեբանորեն նշանակում է՝ այդ մարդիկ գիտեն, որ դա իրենցը չէ, բայց ինչքան գոռան՝ մերն է, մերն է, կարծում են՝ իրենցը կլինի»:
Սամվել Խուդոյանին ուրախացրել է, որ ԱՄՆ իշխանությունները կատարվածը դիտել են հանցագործություն ու համարում են վանդալիզմ:
Արփինե ՍԻՄՈՆՅԱՆ
