Մոսկվայի ոստիկանությունը 10 րոպեի ընթացքում ահազանգեր է ստացել այն մասին, որ քաղաքի տարբեր կենտրոններում պայթյունի վտանգ կա: Այս մասին հայտնում է ՏԱՍՍ-ը՝ վկայակոչելով ոստիկանական ծառայությանը:
«Մոսկվայում զանգվածային հաղորդագրություններ են ստացվել առևտրի կենտրոններում և կրթական հաստատություններում պայթյունների վտանգի մասին: Այս պահին ստուգվում է ավելի քան 10 հաստատություն, հիմնականում առևտրի կենտրոններ»,- ասել է աղբյուրը:
Վերջինս հստակեցրել է, որ այդ հաստատությունների թվում են «Երևան պլազան», գործարար Սամվել Կարապետյանին պատկանող «Եվրոպարկ» և «Ռիո» կենտրոնները, «Սինեմա սթար» կինոթատրոնների ցանցը, ինչպես նաև Ռուսաստանի տեխնոլոգիական համալսարանը:
Աղբյուրը, սակայն, չի հստակեցրել, արդյոք տարհանում իրականացվել է, թե ոչ: «Իրավապահ մարմինների աշխատակիցներն այժմ ստուգում են այդ հաստատությունները՝ կասկածելի առարկաների առկայության հիմքով»,- ասել են իրավապահ մարմիններում:
«Դեպքի վայր են ուղարկվել ԱԻՆ մասնագետներ, ոստիկանության ծառայողներ, ինչպես նաև քրեագետներ՝ այդ հաղորդագրությունները ստուգելու համար»,- ասել է գործակալության զրուցակիցը:
Պատրաստեց՝ Վիկտորյա ԱՆԴՐԵԱՍՅԱՆԸ
