Ինչպես տեղեկացրել ենք, այսօր Վերաքննիչ քրեական դատարանում երկրորդ նախագահ Ռոբերտ Քոչարյանի խափանման միջոցի վերաբերյալ բողոքի քննությունն է ու Ռոբերտ Քոչարյանը մասնակցում է դատական նիստին:
Քիչ առաջ Քոչարյանի պաշտպան Հայկ Ալումյանը լրագրողների հետ զրույցում տեղեկացրեց, որ դեռեւս իրենց բողոքն են շարունակում ներկայացնել:
Հարցին՝ Ռոբերտ Քոչարյանը դատարանում ի՞նչ հայտարարություն է արել՝ պատասխանեց, որ որեւէ հայտարարություն դեռ չի արել, միայն նշել է, որ դատարանին ինքնաբացարկ հայտնելու միջնորդություն չունի:
Ալումյանն ասաց, որ առաջին ատյանի դատարանի դատաքննությանը Քոչարյանը որոշեց չգալ, քանի որ գտնում էին, որ ձեւական էր դա: Հարցին՝ հիմա ձեւական չէ՞ր՝ Ալումյանը պատասխանեց. «Հիմա մենք հույս ունենք, որ գործը կքննվի օբյեկտիվ ու օբյեկտիվ որոշում կկայացվի: Համենայնդեպս, այդ հույսը կա»:
Եթե այսօր բողոքը ներկայացնեն ու ավարտեն, Ռոբերտ Քոչարյանը հայտարարությամբ հանդես կգա ու դատարանում ելույթ կունենա: Ելույթի տեքստն ինքն անձամբ է գրել:
Հարցին՝ այս ընթացքում ո՞վ է այցելել Ռոբերտ Քոչարյանին՝ Ալումյանը պատասխանեց՝ Մարդու իրավունքների պաշտպանը, մենք: Պատգամավորներից որեւէ մեկը չի այցելել:
Իսկ այն, թե ինչու է Քոչարյանը մերժել, որ Արտակ Զեյնալյանն իրեն այցելի, պարզվում է՝ հետաքրքիր պատմություն ունի: Ալումյանն ասաց, որ այսօր Քոչարյանին կհարցնի, եթե դեմ չի լինի՝ լրագրողներին կպատմի մանրամասները:
Հռիփսիմե ՋԵԲԵՋՅԱՆ
