«Արտակ Զեյնալյանն իր սեղանին պետք է ունենար նրանց ցուցակը, ովքեր իրենց համարում են քաղաքական հալածյալ». Փոստանջյան

«Սա խոսում է այն մասին, որ ՀՀ-ն շարունակում է բռնապետություն մնալ: ՀՀ իշխանություններն ապօրինություն եւ հանցավոր անգործություն են դրսեւորել»,-«Հայելի» մամուլի ակումբում այսօր անդրադառնալով լրագրող, ազատամարտիկ Մհեր Եղիազարյանի՝ ՔԿՀ-ում մահանալու դեպքին, ասաց «Երկիր Ծիրանի» կուսակցության ղեկավար, ԱԺ նախկին պատգամավոր Զարուհի Փոստանջյանը: Նրա բնորոշմամբ՝ նշյալ դեպքը խոսում է այն մասին, որ մարդու իրավունքները ՀՀ-ում շարունակվում են ոտնահարվել, ինչի մասին է փաստում նաեւ ՄԻԵԴ-ի՝ հօգուտ կաշառքին օժանդակելու համար մեղադրվող գործարար Սամվել Մայրապետյանի կայացրած որոշումը:

Ապա Զարուհի Փոստանջյանն անդրադարձավ արդարադատության նախարար Արտակ Զեյնալյանին. «Եթե նա արդարադատության նախարարությունն է ղեկավարում, իր սեղանին պետք է ունենար այն անձանց ցուցակը, որոնք իրենց հայտարարում են քաղաքական հալածյալ: Մհեր Եղիազարյանը հայտարարում էր իր դեմ հարուցված գործում իր քաղաքական հայացքների դերակատարության մասին: Հացադուլի հայտարարման փաստը պետք է Արտակ Զեյնալյանի անմիջական հսկողության ներքո լիներ: Նա պարբերաբար ՔԿՀ-ից պետք է տեղեկանար այդ մարդու առողջության մասին: Կատարվածի առաջին պատասխանատուն Արտակ Զեյնալյանն է»:

Հիշեցնենք, որ կաշառքի համար մեղադրվող Մհեր Եղիազարյանի մահվան առնչությամբ մեկնաբանություն էր տվել արդարադատության նախարարությունը:

https://www.facebook.com/aravot.am/videos/770289800006590/

Լուիզա ՍՈՒՔԻԱՍՅԱՆ