Հրազդանի նախկին քաղաքապետ Արամ Դանիելյանի դեմ Հրազդանի համայնքապետարանի հայցի քննությունը Կոտայքի մարզի ընդհանուր իրավասության դատարանում այսօր հետաձգվեց:
Նշենք՝ Հրազդանի համայնքապետարանը դիմել է Կոտայքի մարզի ընդհանուր իրավասության դատարան եւ պահանջում է Արամ Դանիելյանին փոխհատուցել համայնքապետարանին պատճառված վնասը, որը կազմում է շուրջ 3 միլիոն դրամ: Հայցվոր կողմը պահանջել էր Դանիելյանի գույքի եւ դրամական միջոցների վրա արգելանք դնել, սակայն դատարանը մերժել էր միջնորդությունը:
Հրազդանի համայնքապետարանի՝ այս գործով ներկայացուցիչ, փաստաբան Մխիթար Բեգյանը Aravot.am-ի հետ զրույցում ներկայացրեց դատական նիստի հետաձգման պատճառը. «Երեկ պատասխանողի փաստաբանը միջնորդություն էր գրել դատական նիստը հետաձգել: Այն հետաձգվել է, նոր օր չի նշանակվել: Պատասխանողի փաստաբանը պատճառաբանել էր, որ այլ նիստերով զբաղված է լինելու»:
Խնդրեցինք մանրամասնել նախկին քաղաքապետ Արամ Դանիելյանի երեք միլիոնի պահանջը: Մխիթար Բեգյանը պարզաբանեց. «Նախկին քաղաքապետին 3 միլիոնի պահանջ ենք ներկայացրել: Նա իր աշխատողներին արձակուրդ չի ուղարկել, և քաղաքապետարանն այդ հիմքով վնաս է կրել: Այսինքն՝ աշխատողը նախկին քաղաքապետի հրաժարականից հետո դիմում է գրել աշխատանքից ազատվելու, նրան վերջնահաշվարկ են տվել օրենքով սահմանված կարգով, որը կազմել է մոտ 3 միլիոն դրամ: Հրազդանի ներկայիս քաղաքապետարանը հայտարարում է, որ ինքը վնաս է կրել նախկին քաղաքապետի ապօրինի գործունեության հետևանքով: Եթե ժամանակին մարդուն ուղարկեին արձակուրդ, արձակուրդայինը կտային, այդ ժամանակ այդքան չէր կուտակվի»:
Մեր հարցին՝ հիմա այդ կուտակված գումարը նոր քաղաքապե՞տն է վճարել, Մխիթար Բեգյանը պատասխանեց. «Այո, օրենքով քաղաքապետարանը չէր կարող վերջնահաշվարկ չվճարել: Բայց քանի որ նախկին քաղաքապետի գործողություններով է դա առաջացել, դրա համար դիմել ենք դատարան: Աշխատողը մեղք չունի, աշխատողին այսպես թե այնպես իր վերջնահաշվարկը վճարել են. թե նախկինում ինչ է եղել, ինչ չի եղել, դատական քննությունը կպարզի»:
Տաթև ՀԱՐՈՒԹՅՈՒՆՅԱՆ
