Կառավարության կառուցվածքի փոփոխությունների նախագիծն ի վերջո ինչո՞ւ չի գալիս ԱԺ եւ ԱԱԾ-ի ու ոստիկանության կարգավիճակն ի՞նչ է լինելու, դառնալո՞ւ են նախարարություն: Այսօր լրագրողների այս հարցերին ի պատասխան՝ վարչապետ Նիկոլ Փաշինյանն ասաց, որ ոստիկանությունում ունեցած կոլեգիալ նիստի իր ելույթում անդրադարձել է դրան.
«Միանշանակ է, որ պետական մարմինները պետք է լինեն խորհրդարանական վերահսկողության ներքո, բայց դա չի նշանակում, որ դրա ճանապարհը նախարարություն դարձնելն է: Ի՞նչ է նշանակում նախարարություն ոստիկանության պարագայում, նշանակում է, որ այդ ուժային կառույցի ղեկավարը պետք է քաղաքական դեմք նշանակվի, սրանից բխում է, որ այդ կառույցն ուղղակիորեն կամ անուղղակիորեն կուսակցականացվելու է: Այսօրվա կարգավորման արդյունքում ոստիկանության ու ընդհանրապես իրավապահ համակարգի կայունությունը որոշակիորեն պահպանվել է, այնտեղ փոփոխություններ, կադրային փոփոխությունները լինում են բալանսավորված, որ համակարգի կայունությունը ու դրանից նաեւ երկրի անվտանգությունը չխաթարվի: Իսկ նախարարի դեպքում նշանակում է հայեցողական պաշտոն, նշանակում է ցանկացած մեկին կարելի է նշանակել այդ պաշտոնում: Այս պարագայում կան որոշակի չափանիշներ ոստիկանության բարձրագույն խմբի պաշտոնյա պետք է լինի: Սա բալանսավորված մոտեցման է բերում: Այն, որ ոստիկանությունը պետք է լինի խորհրդարանական վերահսկողության ներքո, դրա հետ ես համաձայն եմ»:
Փաշինյանը նշեց, որ վերջին տարիների համար աննախադեպ դեպք է տեղի ունեցել, երբ ԱԱԾ տնօրենը անձամբ գնացել է բյուջեի կատարողականի քննարկումներին մասնակցելու:
Քանի որ նախարարությունները պետք է միավորվեն ու 12 նախարարություն լինի, վարչապետն ասաց, որ այդ գործընթացն ուզում են իրականացնել առավել անցնցում ու սահուն ու ուզում են, որ դե ֆակտո գործընթացը պլանավորել, նոր դե յուրե անել. «Եթե կարծում են, որ որեւէ նախարար վարչապետին պակաս ենթակա է, քան ԱԱԾ տնօրենը կամ ոստիկանության պետը, դա սխալ տպավորություն է: Աշխարհում չկա երկիր, որտեղ նախարարը վարչապետին չի ենթարկվում»:
Հռիփսիմե ՋԵԲԵՋՅԱՆ
