ՀՀ-ում Ուկրաինայի դեսպանատան առաջ այսօր մի խումբ քաղաքացիների բողոքի ցույց էր։ Նրանք դեսպանին նամակ հղեցին` պահանջով, որպեսզի հետամուտ լինեն Ուկրաինայի բանտերից մեկում պահվող Սերգեյ Կարապետյան եւ Խաչատուր Հովհաննիսյանի հանդեպ կտտանքների խնդրին։
«Ուկրաինայի իշխանություններից պահանջում ենք, որպեսզի խոշտանգումները դադարեն։ Մեր հայրենակիցները հանրային պաշտպան ունեն, որը գործին հետամուտ չէ»,-լրագրողների հետ զրույցում ասաց ցույցի կազմակերպիչներից Սարգիս Տեր-Եսայանը։ Նրա փոխանցմամբ` կտտանքների են ենթարկվում նաեւ նույն սպանության գործով կալանավորված երկու ռուսներն ու մեկ թալիշը։
Ինչ վերաբերում է տեղեկություններին, որ խոշտանգումներն Ադրբեջանի իշխանությունների ձեռքի գործն են, ցույցի մասնակից, ազատամարտիկ Վոլոդյա Ավետիսյանն ասաց. «Ադրբեջանի իշխանությունները սովոր են կաշառել ինչ-որ մարդկանց։ Կան այդպիսիք, որոնք աշխատում են բանտերում։ Նրանց փող են տալիս եւ հրահանգում այս կամ այն մարդկանց ճնշել ու ծեծել, աստիճանաբար սպանել, որպեսզի բանտերից դուրս չգան։ Մենք համոզված ենք դրանում»:
Հիշեցնենք, որ Ուկրաինայի քաղաքներից մեկում հայերի և ադրբեջանցիների միջև վեճ էր եղել 4 տարի առաջ. Մեկ զոհ էր եղել` ադրբեջանցի։ Ըստ մամուլում առկա տեղեկությունների` վեճի առիթը ադրբեջանցիների կողմից Ջուղայի հայկական խաչքարերի եւ պատմամշակութային այլ կոթողների ոչնչացումն է եղել։ Դատավարությունը դեռ ընթանում է։
Այլ մանրամասները` տեսանյութում։
Լուիզա ՍՈՒՔԻԱՍՅԱՆ
