Ինչպես արդեն տեղեկացրել ենք՝ հունվարի 29-ին, վաղ առավոտյան Լոս Անջելեսի երկու՝ ՀԲԸՄ Մանուկյան-Դեմիրճյան եւ Սուրբ նահատակ Ֆերրահյան, դպրոցների աշակերտները եւ ուսուցիչները տհաճ անակնկալի են եկել՝ տեսնելով իրենց դպրոցների շենքերի եւ դարպասների վրա փակցված թուրքական դրոշները:
Ոստիկանությունը հետաքննություն է սկսել՝ ենթադրյալ «ատելության» քարոզի հիմքով՝ հաղորդում է nbclosangeles.com-ը :
Ֆերրահյան դպրոցի տնօրեն Սոսի Շանլյանը nbclosangeles.com-ին ասել է, որ դպրոցի տեսախցիկները ֆիքսել են մուգ հագուստով եւ դիմակով մարդու:
Որպեսզի ամերիկացի ընթերցողներն ավելի լավ ըմբռնեն տեղի ունեցածի իմաստը՝ ՀԲԸՄ Մանուկյան-Դեմիրճյան դպրոցի տնօրեն Արփի Ավանեսյանը համեմատություն է արել. «Հայկական հաստատության վրա թուրքական դրոշ փակցնելը նույնն է, թե Սինագոգի վրա ֆաշիստական սվաստիկա փակցնեին»:
Միջադեպին անդրադարձել է նաեւ «Լոս Անջելես թայմսը»՝ հիշեցնելով Հայոց ցեղասպանության եւ Թուրքիայի ժխտողական քաղաքականության մասին:
