«Եթե մենք չունենք լավ վարձատրվող պրոֆեսիոնալներ, ապա այդ խնդիրներն այդպես էլ կմնան։ Պետք է տեսնենք՝ որտեղ է ոսկե միջինը, եւ ինչ նախագծերով կարող ենք կարգավորել»,-խորհրդարանում, լրագրողների հետ զրույցում ասաց իշխող «Իմ քայլը» խմբակցության ղեկավար Լիլիթ Մակունցը:
Հիշեցնենք, այսօր խմբակցության նիստին մասնակցել է նաեւ ՊԵԿ նախագահ Դավիթ Անանյանը : Նիստում քննարկվել է աղմուկ հանած պարգեւավճարների հարցը :
Լիլիթ Մակունցն ընդունում է, խնդիր կա, քանի որ ունենք օրենքներ, որոնք թույլ են տալիս պարգեւատրումներ տրամադրել, մյուս կողմից`կա անարդարության զգացում, որը հանրությունը բարձրաձայնեց: Լիլիթ Մակունցի խոսքով, իրենք ցանկանում են ունենալ արդյունավետ աշխատող պետական համակարգ, որտեղ հանրությանը հուզող խնդիրները լուծում են ստանում, բայց, եթե «չունենք լավ վարձատրվող պրոֆեսիոնալներ, ապա այդ խնդիրներն այդպես էլ կմնան»: Քննարկումից մանրամասներ Լիլիթ Մակունցը չհրապարակեց:
Լիլիթ Մակունցը նաեւ տեղեկացրեց, որ Դավիթ Անանյանը խորհրդարան հրավիրվող միակ պաշտոնյան չի լինելու. «Եթե ուզում ենք համապարփակ լուծում, չենք կարող մեկ գերատեսչության հետ առնչվող խնդիրներով լուծումներ տալ»: Բայց թե էլի ովքե՞ր կհրավիրվեն խորհրդարան, նա առայժմ չբարձրաձայնեց:
Նելլի ԳՐԻԳՈՐՅԱՆ
