Կալանավորի մահը մեծ քննարկումների առիթ դարձավ սոցիալական ցանցերում: Շատերը նրա մահվան համար մեղադրում էին իշխանություններին՝ մյուսները փաստաբաններին, որ պատշաճ չեն բարձրաձայնել նրա առողջական վիճակի, ինչպես նաեւ 44 օր հացադուլում գտնվելու մասին: Մհեր Եղիազարյանի պաշպան Վահե Մակարյանի հետ զրույցը ստորեւ.
– ՔԿ-ն նշում է, որ դատաբժշկական փորձաքննության եզրակացության համաձայն՝ Մհեր Եղիազարյանը մահացել է սրտամկանի ինֆարկտից: Այս պատասխանը ձեզ բավարարո՞ւմ է:
– Իհարկե չի բավարարում, ես ասացի, որ ինքը սրտի խնդիր միշտ ունեցել է, այսինքն, եթե անձը 44 օր հացադուլի մեջ է, սրտի կաթվածից էլ կարող է մահանալ, ինչ-որ մի պատճառից մահանալու է, ես չեմ ասում, որ սովից է մահացել, բայց այդ 44 օրը իր առողջության վրա արդեն անդառնալի ազդեցություն էր թողել:
– 44 օր հետո դադարեցրել էր հացադուլը առողջակա՞ն խնդիրների պատճառով:
– Հացադուլը դադարեցնելու օրը ես գնացել եմ, որ իր հետ հանդիպեմ, ինքը չի կարողացել գալ քննչական սենյակ՝ ընդամենը 20 մետր քայլելու տարածք է: Մինչեւ էդ ինքը դիմանում էր, իր ոտքով գալիս- գնում էր, բայց երբ գրավը մերժվեց, ոնց որ իր դիմադրողականությունը կորավ, էլ չկարողացավ պայքարել:
– Ինչո՞ւ չէիք բարձրաձայնում ձեր պաշտպանյալի հացադուլի եւ առողջական վիճակի մասին:
– Սյունիքում ինքը հայտնի անձնավորություն է ու բարձրաձայնվել է թե՛ իր կայքով, թե՛ «Սյունյաց երկիր» թերթով, ամեն օր ինֆորմացիա է գնացել:
– Դուք հայտարարությամբ հանդե՞ս եկել եք:
– Ինքը կողմ չէր, որ հայտարարություն լինի, շատ աղմուկ բարձրանա: Ինքը հակված չէր, որ շատ մեծ աղմուկ բարձրացնենք, մտածում էր, որ կլուծվի հարցը: Եղել է, որ առաջարկել ենք այլ լրատվամիջոցներով բարձրաձայնենք, բայց ասում էր՝ պետք չի դեռ:
Տաթեւ ԽԱՉԱՏՐՅԱՆ
Հոդվածն ամբողջությամբ՝ «Հայկական ժամանակ» թերթի այսօրվա համարում
