Արևմտյան հեղինակավոր թերթերն անդրադարձել են շաբաթ օրը բանտում մահացած «Հայոց արծիվներ. Միասնական Հայաստան» կուսակցության նախագահ, haynews.am կայքի համակարգող Մհեր Եղիազարյանի մահվանը:
Հայաստանում փոքրիկ կուսակցության առաջնորդը մահացել է բանտում մոտ երկու ամիս տևած հացադուլից հետո, գրում է ամերիկյան հեղինակավոր The New York Times-ը:
Թերթն ընդգծում է, որ Եղիազարյանը անցյալ ամառ հիմնադրված «Հայոց արծիվներ. Միասնական Հայաստան» կուսակցության փոխնախագահն էր:
Նա ձերբակալվել էր դեկտեմբերի 4-ին և մեղադրվում էր մոտ 10 հազար դոլար կաշառք վերցնելու մեջ:
Ամերիկյան մեկ այլ հեղինակավոր թերթ՝ The Washington Post-ը, հղում կատարելով Associated Press գործակալությանը, գրում է, որ 51-ամյա Մհեր Եղիազարյանը մահացել է բանտում 52 օր տևած հացադուլից հետո:
Թերթը հիշեցնում է, որ նա ձերբակալվել էր դեկտեմբերի 4-ին և մեղադրվում էր կաշառք վերցնելու մեջ: Եղիազարյանը հերքում էր իր դեմ առաջ քաշված մեղադրանքները:
«Հայ քաղաքական գործիչը մահացել է 52 օր տևած հացադուլից հետո», գրում է բրիտանական Daily Mail-ը: Պարբերականը նկատում է, որ Եղիազարյանը ձերբակալվել էր դեկտեմբերի 4-ին և հենց հաջորդ օրը հացադուլ սկսել:
Պատրաստեց՝ Վիկտորյա ԱՆԴՐԵԱՍՅԱՆԸ
