Հայաստանի զբոսաշրջության զարգացման հիմնադրամի գործադիր տնօրեն Արա Խզմալյանը Aravot.am-ի հետ զրույցում վկայակոչելով՝ Վանուշ Խանամիրյանի հայտնի միտքը, թե վատ բանը մեկ անգամ պետք է ասել, լավը՝ մի քանի անգամ, անդրադարձավ Եվրանեսթ խորհրդարանական վեհաժողովի հանձնաժողովների նիստերին մասնակցելուց առաջ Մխիթար Հայրապետյանի հանդիպմանը՝ Եվրանեսթում ՀՀ ԱԺ պատվիրակությունը նախկինում գլխավորած Արմեն Աշոտյանի հետ:
Արա Խզմալյանի ձեւակերպմամբ, Մխիթար Հայրապետյանի քայլը ողջունելի է, քանի որ նա այդպիսով կարողացել է հաղթահարել ամրապնդված կարծրատիպերը, խորհրդակցել նախորդ իշխանության ներկայացուցիչների հետ, մարդկանց հետ որոնք ունեն ինստիտուցիոնալ հիշողություն, այդ հարթակներում աշխատելու փորձառություն:
«Փաստորեն նոր-նոր քաղաքական կյանք ոտք դրած այս երիտասարդ տղան դեմ գնացել է հասարակությանը եւ համոզված եմ՝ նաեւ իր գործընկերների դիրքորոշմանը ու արել նման ողջամիտ քայլ»,-ասում է Արամ Խզմալյանը:
Մեր զրուցակցի խոսքերով. «Այս հանգամանքը, որ արտաքին աշխարհում մեր երկրի շահերն առաջ տանելու գործում չպետք է խուսափել հանդիպել բոլոր այն մարդկանց հետ, որոնք այս կամ այն չափով մասնակից են եղել քաղաքական գործընթացներին, պետք է օրինակելի լինի բոլոր քաղաքական գործիչների համար՝ անկախ նրանից նրանք օրենսդիր մարմնում են, թե գործադիրում: Դա պետք է դիտարկել թե ներքին քաղաքական խմորումների համատեքստում, թե արտաքին մարտահրավերներին դիմակայելիս, նաեւ որպես քաղաքացիական պատասխանատվության, պրոֆեսիոնալիզմի դրսեւորում:
Ուզում եմ, որ Մխիթար Հայրապետյանը վճռական լինի իր դիրքոշման եւ աշխատաոճի մեջ՝ անկախ նրանից իր քայլի հանդեպ բացասական խոսքեր կլինեն, թե ոչ: Ինքը պետք է վստահ լինի, որ սա քաղաքացու եւ քաղաքական գործչի գործչի շատ ճիշտ քայլ է:
Բոլոր այն հարցերը, որ վերաբերվում են մեր երկրի արտաքին քաղաքականությանը, պետք է դուրս դրվեն ներքին քաղաքական իրադրություններից: Անկախ ներքին քաղաքական մրցապայքարից, արդարադատության եւ իրավահարաբերությունների կոնտեքստից, մենք պետք է կարողանանք կարեւոր հարթակներում հանդես գալ համատեղ ջանքերով: Էլի եմ ասում՝ կա ինստիտուցիոնալ հիշողություն, եւ մենք խնդիր ունենք այդ հիշողությունը փոխառելու եւ սահուն փոխանցելու քաղաքական կյանքի նոր խաղակիցներին»:
Արա Խզմալյանը համոզված է. «Գոնե արտաքին մարտահրավերներին դիմակայելու համար՝ պետք է վեր կանգնենք ներկուսակցական եւ քաղաքական հակասություններից: Մեր մտավոր, ինտելեկտուալ մասնագիտական ռեսուրսներն այդքան հարուստ չեն, որ կարողանանք շրջանցել երկրի ներսում առկա սակավաթիվ ուժերը: Արտաքին ճակատում չպետք է կողմնորշվել ներքին քաղաքական իրադրությամբ»:
Հիշեցնենք, որ Մխիթար Հայրապետյանից բացի, իր ֆեյսբուքյան էջում հանդիպման մասին գրառում էր կատարել նաեւ Արմեն Աշոտյանը եւ ողջունել Հայրապետյանի նախաձեռնությունը։
Արմեն Աշոտյանը մասնավորապես գրել էր, որ հանդիպման ժամանակ մանրամասն պատմել է իր աշխատանքի, նվաճումների, խնդիրների եւ կառույցի ներքին խոհանոցի մասին, շեշտել, որ պետություն ներկայացնելը պատիվ է, ու ապագայում եւս պատրաստ է հնարավորությունների շրջանակներում աջակցել երկու հայկական պետությունների շահերի պաշտպանությանը արտերկրում:
Գոհար ՀԱԿՈԲՅԱՆ
