«Սկզբունքային մոտեցում ունենք նրա նկատմամբ: Հուսամ՝ մենք սխալվում ենք, բայց մի քանի քրեական գործերով նախաքննություն է իրականացվում: Ինչպիսի որոշում կկայացվի նախաքննության եւ դատաքննության մարմինների կողմից, այդպիսին էլ կլինի մեր վերաբերմունքը»,-լրագրողների հետ զրույցում այսօր անդրադառնալով 19-ամյա զինծառայող Յուրի Բրոյանի դեպքին, ասաց ՀՀ պաշտպանության նախարար Դավիթ Տոնոյանը:
Հիշեցնենք՝ մամուլում հրապարակումներ կան, որ ըստ փաստաբանի՝ Բրոյանն ունի ժառանգաբար փոխանցվող հոգեկան առողջության խնդիր, եւ 2018թ. ծեծի է ենթարկվել հրամանատարի կողմից, ապա՝ տեղափոխվել հոգեկան առողջության կենտրոն:
«Մենք հասկանում ենք, որ դժվարություններ ունենք այդպիսի զինծառայողների առնչությամբ: Նրանք ոչ ծառայում են, ոչ էլ ինչ-որ առաջընթաց է ապահովվում ծառայության առումով: Կողմնակից չեմ հիվանդներին բանակ զորակոչելուն: Կողմնակից չեմ նաեւ մեծ սահմանափակումներով երիտասարդներին զորակոչելուն»,-անդրադառնալով մեղադրանքներին, թե հոգեկան առողջության խնդրով հանդերձ՝ Բրոյանը ծառայության համար ճանաչվել է պիտանի, վստահեցրեց Դավիթ Տոնոյանը:
Լուիզա ՍՈՒՔԻԱՍՅԱՆ
