Վստահաբար խորագրին համամիտ պիտի չըլլայ վարչապետ Նիկոլ Փաշինեան, որովհետեւ Տաւոս այցելութեան մասին իր ցարդ հրապարակած տեղեկութիւններով կը հաւաստիացնէ, թէ Զուիցերիոյ Ալփեան աւանին կատարած իր ճանապարհութիւնը քաղաքական օրակարգ չէ ունեցած։
Այլ խօսքով, ըստ վարչապետին, եղածը պարզ այցելութիւն մըն էր։ Եւ պատահած է, որ Ատրպէյճանի նախագահ Իլհամ Ալիեւը եւս հոն գտնուած է։ Այս պատահական առիթով, երկուքը տեղւոյն վրայ համաձայնած են հանդիպիլ։ Պատահական հանդիպումը տեւած է մէկ ու կէս ժամ։ Քանի որ այս մէկը պատահական էր, ո’չ հանդիպումը եւ ո’չ ալ երկկողմանի խօսակցութիւնը պաշտօնական բնոյթ ունեցած է։ Ըստ վարչապետի հաւաստիացումներուն, հանդիպումը «ընկալումներին ծանօթանալու, շփուելու հնարաւորութիւն» եղած է։
Քաղաքականութիւնը կարելիին արուեստն է, սակայն երբեք պատահարներու հետեւանքով տեղի չունենար։ Ինչպէս Ամերիկացի նախագահ Ֆրէնքլին Տ. Ռուզվելթ ըսած է. «Քաղաքականութեան մէջ ոչինչ պատահարով կը պատահի։ Եթէ պատահի, վստահ եղիր որ այդպէս ծրագրուած էր»:
Այս «պատահական հանդիպումը» դուռ կը բանայ բազմաթիւ հարցումներու, որոնց պատասխանները պիտի չտրուին հայրենի իշխանաւորներուն կողմէ։ Բառակոյտերու մուխի եւ բացատրութիւններու հայելիի գործածութեամբ, անոնք պիտի դիմեն քաղաքական կախարդութիւններու՝ ծածկելու համար քաղաքական իրականութիւնը եւ հետապնդուող նպատակը։
Արդէն իսկ կանխելու համար նման հարցադրումներ, վարչապետը «շեշտելով» կը վստահեցնէ մեր բոլորին, թէ «դաւադրութիւններ լինել չեն կարող, աբսուրդ է նոյնիսկ մտածել այդ մասին»:
Սակայն, «դաւադրութեան» մասին խօսք ընող չկայ։ Պահանջուածը պարզապէս անկեղծ բացատրութիւն ստանալն է։ Ակնկալուածը պարզապէս մեր հաւաքական շահերը յուզող հարցի մասին տեղեկութիւններու թափանցիկութիւնն է եւ հետապնդուած նպատակը հարազատութեամբ ներկայացնելու պարկեշտութիւնն է։
Ի բացակայութիւն այս պահանջուածին ու ակնկալուածին, բնականօրէն Տաւոսեան այցելութիւնը պատահական ըլլալու փոխարէն կը վերածուի առաքելութեան։
Սեդօ ՊՈՅԱՃԵԱՆ
Հոդվածն ամբողջությամբ՝ «Հայրենիք» շաբաթաթերթի այս համարում
