Արգելվել է շվեդական Fojo Media Institute -ի աշխատակից, Բելառուսի հետ տարվող ծրագրերի ղեկավար Օլգա Վալեի մուտքը Բելառուս՝ ռուսական «սեւ ցուցակում» լինելու պատճառով: Այդ մասին տեղեկանում ենք Բելառուսի լրագրողական ասոցիացիայի կայքից :
Բելառուսի լրագրողական ասոցիացիայի հրավերով Օլգա Վալեն պետք է ժամաներ այդ երկիր՝ հանդիպելու տեղի երիտասարդ լրագրողների հետ: Հունվարի 25-ին, սակայն, նա ձերբակալվել է Մինսկի օդանավակայանի սահմանապահ ծառայության աշխատակիցների կողմից: Նրան հայտնել են, որ չի կարող մուտք գործել Բելառուս եւ հավելել, որ Բելառուսը Ռուսաստանի հետ համատեղ «սեւ ցուցակ» ունի, իսկ տիկին Օլգան ՌԴ «սեւ ցուցակում» է:
Բելառուսի լրագրողական ասոցիացիայի, Բելառուսի Ժուռնալիստների միության եւ Բելառուսի պետական համալսարանի ժուռնալիստիկայի ինստիտուտի փաստմամբ, Fojօ Media Institute-ը շուրջ 15 տարի է համագործակցում է բելառուսական լրագրողական կազմակերպությունների հետ: Նախկինում նման միջադեպեր չեն գրանցվել:
Օլգա Վալեն Ֆեյսբուքի իր էջում գրել է. «Ահա այսպես ավարտվեց իմ այցը Բելառուս: Սահմանին կանգնած ես անցանկալի անձ էի այդ երկիր մուտք գործելու համար: 4 թռիչքից, գնացքով, ապա 100 կմ մեքենայով գնալուց հետո երեկոյան վերջապես այս դժոխքը կավարտվի եւ կվերադառնամ տուն: Ասացին, որ Ռուսաստան էլ չեն թողնի»:
Կփորձենք նաեւ մեկնաբանություն ստանալ տիկին Վալեից:
Պարտրաստեց Գոհար ՀԱԿՈԲՅԱՆԸ
Լուսանկարը՝ baj.by-ի:
Հ.Գ.- Ի դեպ, FOJO մեդիա ինստիտուտի հետ համագործակցել են նաեւ հայաստանյան շատ լրատվամիջոցներ, այդ թվում՝ «Առավոտը», եւ լրատվությանն առնչվող հասարակական կազմակերպություններ:
