Aravot.am-ը Իոսիֆ Աղաջանովի սպանության համար ցմահ անազատության դատապարտված Մհեր Ենոքյանին ներում շնորհելու հետ կապված սպանվածի քրոջը՝ Ելենա Աղաջանովային հարցրեց՝ դուք ինչպե՞ս կվերաբերվեք, եթե ամեն դեպքում, ի հեճուկս ձեր բերած փաստարկների, Մհեր Ենոքյանին ներում շնորհեն, ու նա հայտնվի ազատության մեջ:
Նա պատասխանեց. «Ես հուսով եմ՝ երկրի ղեկավարությունը ճիշտ որոշում կկայացնի, եւ այդ որոշումը կբխի ազգի, հանրության շահերից: Սա այնքան մեր խնդիրը չի: Մեր երեխային մենք էլ չենք վերադարձնի, բայց ես նախապես խորը ցավում եմ բոլոր այն հնարավոր վշտի, ցավի, արյան համար, որը կլինի: Իսկ դա կլինի, եթե ինքը դուրս գա: Եթե ինքը դուրս գա ու հանրության մեջ լինի, արյուն կլինի, կհիշեք, կտեսնեք: Աստված չտա»:
Ճշտեցինք՝ այսինքն, կարծում եք նորից կփորձի նման բա՞ն անել՝ նա պատասխանեց. «Ուրիշ ձեւերով, բայց մի բան կլինի հաստատ: Կլինի ցավ, կլինի վիշտ: Ես չեմ ասում միայն մեր մասով: Միայն մեր մասին չի խոսքը, տարբեր մարդկանց»:
Երբ հարցրեցինք՝ արդեն բավականին երկար ժամանակ է անցել՝ ավելի քան 20 տարի, արդյո՞ք ժամանակն ինչ-որ չափով չի մեղմել ձեր ցավը, որ այսօր դուք կարողանաք ներել ու Ենոքյանին տեսնել ազատության մեջ, Ելենա Աղաջանովայի պատասխանը կարդացինք աչքերում: Արցունքները սկսեցին հոսել՝ ցույց տալով, որ վերքը դեռ թաց է, նա տեւական ժամանակ չէր կարողանում հաղթահարել հուզմունքը, որ պատասխաներ. «Ոչ, ցավը չի մեղմացել: Անցել է 22,5 տարի, ոչ, դա հնարավոր չի: Ես չեմ պատկերացնում ինչպե՞ս կարող է նման ցավը մեղմանալ, ուզում է՝ անցնի 100 տարի»:
Հռիփսիմե ՋԵԲԵՋՅԱՆ
