Նախկին փոխվարչապետ Արմեն Գեւորգյանի գործով դատական նիստին դատարանը գնաց խորհրդակցական սենյակ՝ Գեւորգյանի խափանման միջոցի վերաբերյալ որոշում կայացնելու: Որոշումը կհրապարակվի հունվարի 29-ին:
Մինչ դատարան մտնելը Արմեն Գեւորգյանին երբ հարցրեցինք՝ չի՞ պատասխանելու լրագրողների հարցերին՝ նա ասաց՝ հույս ունեմ, այսօր ամեն ինչ լավ է ավարտվելու ու հետո կպատասխանեմ:
Նիստից հետո հարցին, թե ի՞նչ ակնկալիք ունեք դատարանից՝ նա ի պատասխան նախ շնորհակալություն հայտնեց, որ ԶԼՄ-ներն այսքան հետաքրքրություն են դրսեւորել իր գործի նկատմամբ: Արմեն Գեւորգյանն ասաց, որ «այս պահին որեւէ նոր բան ասելու չունեմ, դատարանը հեռացել է խորհրդակցական սենյակ, սպասենք ամսի 29 –ին որոշումը կհրապարակվի՝ կիմանանք»:
Հարցին՝ դուք Մարտի 1-ի ֆիլմում նկարահանվելու առաջարկ ստացե՞լ եք՝ Գեւորգյանը չպատասխանեց: Ավելի ուշ, երբ պարոն Գեւորգյանին ասացինք, թե ինչո՞ւ չի պատասխանում հարցերին, խուսափո՞ւմ է՝ նա արձագանքեց. «Սիրելի բարեկամներ, դուք արդեն չարաշահում եք բոլոր հնարավոր բաները: Նպատակահարմար չեմ գտնում այս պահին որեւէ հարցի պատասխանել»: Նա արագ նստեց իր մեքենան ու հեռացավ:
Հռիփսիմե ՋԵԲԵՋՅԱՆ
