Եվրոպայի խորհրդի խորհրդարանական վեհաժողովը ձմեռային նստաշրջանում երեկ ընդունել է Վեհաժողովի մոնիտորինգային ընթացակարգերի ու դրանց ժամանակավոր վերանայման մասին բանաձև:
ԵԽԽՎ ընդհանուր մոնիտորինգի տակ է գտնվում 10 երկիր՝ Հայաստան, Վրաստան, Ադրբեջան, Թուրքիա, Ուկրաինա, Մոլդովա, Ռուսաստան, Սերբիա, Ալբանիա, Բոսնիա և Հերցեգովինա, իսկ հետմոնիտորինգային գործընթացում՝ Բուլղարիան, Մոնտենեգրոն և Մակեդոնիան։
Բանաձևում Վեհաժողովը ողջունում է զեկույցի ժամանակաշրջանում գրանցված դրական զարգացումներն ու առաջընթացը մի շարք երկրներում:
Մասնավորապես նշվում է, որ Հայաստանը կարողացել է խաղաղ ճանապարհով հասնել խաղաղության, և դա համապատասխանում է նոր Սահմանադրության դրույթներին:
Հայաստանի իշխանությունները գլխավոր ընտրություններից հետո պետք է վերսկսեն բարեփոխումներն առանցքային ոլորտներում, ինչպիսիք են ընտանեկան բռնության դեմ պայքարը, և ընդունեն օրենսդրություն, որը հնարավորություն կտա արդյունավետ կերպով պայքարել ընտրությունների ընթացքում ձայների գնման և վարչական ռեսուրսի կիրառման դեմ:
Բացի այդ Հայաստանին խորհուրդ է տրվում ապահովել, որ բոլոր քրեական գործերը, այդ թվում 2008թ. մարտի ողբերգական իրադարձությունների, կոռուպցիայի մասին պնդումների քննությունները, խստորեն պետք է համահունչ լինեն օրենքի դրույթներին, արդարադատության անկախությանը և անկախ դատավարությանը:
Պատրաստեց՝ Վիկտորյա ԱՆԴՐԵԱՍՅԱՆԸ
