Եվրոպայի խորհրդի խորհրդարանական վեհաժողովի (ԵԽԽՎ)՝ հունվարի 21-25-ն անցկացվող ձմեռային նստաշրջանին հայկական պատվիրակությունը մասնակցում է նոր կազմով: Այն գլխավորում է ՀՀ ԱԺ արտաքին հարաբերությունների հանձնաժողովի նախագահ Ռուբեն Ռուբինյանը: Ներկայացնում ենք Aravot.am-ի հարցազրույցը Ռուբեն Ռուբինյանի հետ:
-ԵԽԽՎ դիտորդական առաքելության ղեկավար Ալեքսանդր Պոչիերը, երբ ԵԽԽՎ-ում ներկայացրեց դեկտեմբերի 9-ին Հայաստանում տեղի ունեցած արտահերթ խորհրդարանական ընտրությունների՝ դիտորդական առաքելության կողմից արձանագրված արդյունքները, թեև նշեց՝ դրանք անցել են խաղաղ ու հանգիստ մթնոլորտում, միևնույն ժամանակ մտահոգություն հայտնեց, որ մարդիկ շատ դեպքերում վախեցել են գնալ ընտրությունների սոցիալական մեդիայում առկա ատելության և անհանդուրժողականության պատճառով: Հետագայում ԵԽԽՎ այլ պատվիրակներ իրենց ելույթներում ևս անդրադարձան սոցիալական ցանցերում ատելության խոսքի տարածմանը: Այդ ամենը չի՞ խամրեցնում ընտրությունների վերաբերյալ՝ ԵԽԽՎ-ում եղած դրական տպավորությունը:
-Բացարձակ: Սոցցանցերի վերաբերյալ՝ իր ելույթում և ոչ զեկույցում Ալեքսանդր Պոչիերը կարճ անդրադարձ է արել: Պոչիերը շատ բարձր էր գնահատում ընտրությունները: Նա և′ հանրայնորեն՝ ելույթի ընթացքում ասաց, որ հայերին շնորհավորում է լավ ընտրություններ կազմակերպելու համար, և′ մասնավոր զրույցներում: Ես բազմիցս զրուցել եմ իր հետ: Ինքը մի քանի անգամ կրկնել է, որ շնորհավորում է փայլուն ընտրությունների կազմակերպման կապակցությամբ: Իսկ այդ մի փոքրիկ մտահոգությունը պետք է հասկանալ: Չի կարող զեկույցը, նաև զեկուցողի տեսանկյունից, հարյուր տոկոսանոց իդեալական լինել: Զեկուցողը պետք է փորձի ինչ-որ խնդիրների մասին նշել իր ելույթում: Բացի այդ ելույթից հետո միանգամից մեր պատվիրակության անդամները, մասնավորապես, Էդմոն Մարուքյանն անդրադարձավ և նշեց, որ այդ գործողությունը տեղի չի ունեցել և մասնակցության վրա չի ազդել: Իրականում մասնակցության տոկոսի վրա ազդել են այլ գործոններ: Այնպես որ, կարծում եմ՝ ուշացված են այդ մասին՝ հայկական մամուլում տեղ գտնող տեղեկությունները: Փաստ է, որ այստեղ առանց բացառության բոլորը շատ բարձր են գնահատում անցկացված ընտրությունները և շնորհավորում Հայաստանին այդ ընտրությունների կապակցությամբ:
-Իսկ ինչո՞ւ Դուք չէիք արձագանքում Հայաստանի հասցեին հնչող քննադատություններին, թեև դահլիճում էիք: Այս հարցում Ձեզ շատ են քննադատում:
-Քննադատողները ծանոթ չեն ԵԽԽՎ ընթացակարգերին: ԵԽԽՎ-ում հնարավոր չէ միանգամից ձայն խնդրել և խոսել: Այստեղ ելույթների համար գրանցվում են նախապես: Ես նույնպես գրանցված էի, ընդ որում, գրանցվել էի հունվարի 9-ին, իսկ Էդմոն Մարուքյանը գրանցվել էր Նոր տարվանից առաջ: Ընթացակարգն այնպիսին է, որ գրանցվածները ելույթ են ունենում ըստ գրանցման հաջորդականության և մինչև այն պահը, մինչև չի ավարտվում տվյալ նիստը, եթե այն ավարտվում է, այլևս ելույթ չի լինում: Բնականաբար, ես Նոր տարվանից առաջ պատգամավոր չէի և չէի կարող իմանալ, որ ԵԽԽՎ-ում հայկական պատվիրակությունն եմ ղեկավարելու և չէի կարող ավելի շուտ գրանցված լինել, իսկ պարոն Մարուքյանը գրանցված էր ավելի շուտ, և իր հերթն ավելի շուտ հասավ: Բացարձակ որևէ տարբերություն չկա, քանի որ անկախ նրանից, թե ով որ կուսակցությունից է, մենք այստեղ մեկ թիմ ենք և միասին: Նաև ես եմ խնդրել պարոն Մարուքյանին մի քանի բան ասել և միասին ենք աշխատել իր ելույթի վրա՝ կոնկրետ Ադրբեջանին ի պատասխան ելույթի վրա: Նա էլ իր ելույթում նշեց, որ խոսում է պատվիրակության անունից:
-Հայաստանը ԵԽԽՎ ձմեռային նստաշրջանին մասնակցում է պատվիրակության նոր կազմով: Ի՞նչ առաջնահերթություններ ունեք Դուք՝ որպես պատվիրակության ղեկավար: Նախկին պատվիրակության ղեկավարների աշխատանքը հաճախ էր քննադատվում, ի՞նչն եք փոխելու:
-Սա պատվիրակություն է, որը ձևավորվել է Հայաստանում տեղի ունեցած ահռելի փոփոխություններից հետո: Մեր դիրքերը շատ ավելի ուժեղ են ԵԽԽՎ-ում, քանի որ այն բոլոր քննադատությունները և մտահոգությունները, որոնք հնչել են Հայաստանի մասին նախկինում՝ կապված նախկին իշխանությունների հետ, այլևս չեն հնչեցվում: Կարծում եմ մենք պետք է կենտրոնանանք ընդհանուր՝ ոչ միայն Հայաստանին վերաբերող հարցերի վրա, այլև Եվրոպայում՝ ընդհանրապես աշխարհում ժողովրդավարության և մարդու իրավունքների հարցերի վրա՝ հաշվի առնելով Հայաստանի շահերն ու մեզ կոնկրետ հետաքրքրող հարցերը: Կարևոր է նաև ավանդական ուղղությունը հետևելու, որպեսզի ադրբեջանցիները մեզ համար անբարենպաստ նախաձեռնություններ չբերեն ու չանցկացնեն:
-Մենք միշտ ադրբեջանցիներին պատասխանողի դերում ենք եղել: Շարունակվելո՞ւ է այդ քաղաքականությունը:
-Դրա մեջ այդքան էլ վատ բան չկա: Այսինքն՝ հենց դա է մեր ու ադրբեջանցիների տարբերությունը, որ մենք այստեղ ենք իրոք ժողովրդավարության և մարդու իրավունքների համար: Մեր կառուցողական պահվածքը, ես ընդհանրապես Հայաստանի մասնակցության մասին եմ խոսում, շատ ավելի է գնահատվում, քան ադրբեջանցիների փոքրիկ չարաճճիությունները: Բայց, բնականաբար, երբ տեղը գալիս է, մենք պատասխանում ենք ու պատասխանելու ենք մշտապես:
-Ադրբեջանի պատվիրակության ղեկավար Սամադ Սեիդովն ընտրվեց ԵԽԽՎ փոխնախագահ և դարձավ Բյուրոյի անդամ: Սա վտանգավոր չէ՞ մեզ համար և բարդություններ չի՞ ստեղծում:
-Այդ հարցը ռոտացիոն սկզբունքով է կարգավորվում. մեկ իրենց հերթն է հասնում, մեկ՝ մերը: Մեր հերթն էլ է նախկինում եղել ու էլի լինելու է: Այդ հարցը մեզնից կամ մեկ ուրիշից կախված չէ: Լավ չէ, որ ադրբեջանցի պատվիրակը փոխնախագահ է և Բյուրոյի անդամ, լավ կլիներ՝ չլիներ, բայց այսպես է ընթացակարգը: Իրենք ժամանակ առ ժամանակ լինելու են, ուզենք, թե չուզենք, իրենք էլ ուզեն, թե չուզեն, մենք ենք լինելու:
-Երեկ ԵԽԽՎ-ում հայկական պատվիրակության նոր անդամները հանդիպում ունեցան Լիլիան Մորի Պասկեի հետ: Հանդիպումը հայկական պատվիրակության նախաձեռնությա՞մբ էր: Միայն ծանոթանալո՞ւ նպատակ ուներ, թե՞ նաև պայմանավորվածություններ են ձեռք բերվել:
-Մեր նախաձեռնությունն էր՝ հաշվի առնելով, որ պատվիրակության մեջ նոր անդամներ կան: Ծանոթանում էինք, քննարկել ենք տարբեր հարցեր Հայաստանի, ԵԽԽՎ-ի հետ կապված, կապված հնարավոր և պլանավորվող այցերի հետ:
Տաթև ՀԱՐՈՒԹՅՈՒՆՅԱՆ
Ինչ փոքրիկ չարաճճիություն: Նրանք լուծում են հեռահար ու ռազմավարական խնդիրներ: Ժամանակն է այդ հասկանալ ու իրականացնել համարժեք հակաքայլեր: