Ինչպես տեղեկացրել էինք՝ արդեն տեւական ժամանակ է, ինչ Վանաձորի պետական պոլիտեխնիկական քոլեջի բակ տանող ճանապարհը վերածվել է սահադաշտի:
Պատճառն այն է, որ քոլեջից քիչ հեռու գտնվող ջրամբարից ջուրը հոսելով լցվում է ուսումնական հաստատության բակ տանող ճանապարհ, այն դարձնելով անանցանելի:
Խնդրի վերաբերյալ փորձեցինք պարզաբանում ստանալ «Վիոլա ջուր» ընկերությունից: Ընկերության հանրային կապերի ծառայության պետ Մուրադ Սարգսյանն ասաց, որ տեղյակ են ստեղծված իրավիճակի մասին: Նա վստահեցրեց, որ տասը օր առաջ ընկերության աշխատակիցները խնդրին լուծում են տվել: Իսկ սառած ճանապարհը մինչ այդ եկած ջրի հետեւանքն է. «Նման դեպքեր մի քանի անգամ եղել է: Դա պայմանավորված է նրանով, որ բարձունքում գտնվում է Վանաձորի ջրամատակարարման համակարգի կառույցներից մեկը, որի մեջ ջուրը գալիս է, իր ճնշումը կոտրում է, հետո նոր գնում է ցանց: Երբ ջրի քանակը շատանում է, այնտեղ հատուկ տեղ կա, որպեսզի վնաս չպատճառի, ջուրը դուրս է թափում: Եվ մի քանի անգամ եղել է, որ ջուրը եկել է այդ տարածք: Բայց տեղամասի պետն ասաց, որ խնդիրը կարգավորված է, եւ պետք է այլեւս ջուրը չգա: Հուսով ենք, որ նման բան չի կրկնվի: Միջոցներ ձեռնարկվել են, այնտեղ փական է տեղադրված, փորձում են ճնշումը կառավարել, որ այլեւս նման բան չլինի: Խնդիրն այն չէ, որ թողտվություն կա, ոչ, պարզապես ինժեներական կառույց է, եւ երբ ջրի քանակը ավելանում է, դուրս է թափվում, որ չվնասի»:
Մինչ ընկերության ներկայացուցիչը վստահեցնում է, որ խնդիրը վերացված է, թաղամասի բնակիչներն ու քոլեջի դասախոսները պնդում են, որ ջուրը շարունակում է հոսել եւ լցվել շենքի բակ:
Տաթեւիկ ՂԱԶԱՐՅԱՆ
