ԿԳ նախարարության Բարձրագույն որակավորման կոմիտեի (ԲՈԿ) նախագահ Սմբատ Գոգյանը հունվարի 24-ին «Արմենպրեսում» կայացած ասուլիսում հայտնեց, որ այս տարվա սեպտեմբերից ներդնելու են պաշտպանությունների գործերի ընդունման եւ գործընթացի առցանց կազմակերպման համակարգ: «Արդեն աշխատանքները սկսել ենք, իմաստն այն է, որ հայցորդն իր փաստաթղթերը, դիմումը եւ ամեն ինչը կարողանա ԲՈԿ-ի հետ համագործակցությամբ իրականացնել»,-ասաց ԲՈԿ նախագահը:
Սմբատ Գոգյանն ընդգծեց, որ այդպիսով կապահովեն թափանցիկություն, կստեղծվի մի պլատֆորմ, որտեղ բոլոր գործընթացները կերեւան ամեն հայցորդի պրոֆայլում, անգամ իրենք ցանկություն ունեն, որ պաշտպանություններն առցանց հեռարձակվեն:
ԲՈԿ նախագահը հավելեց, որ ցանկացած գիտնական կարող է ատենախոսության ֆայլն ուսումնասիրելով գրագողության դեպքերի, աշխատանքի թերությունների մասին ԲՈԿ-ի կայքի միջոցով տեղյակ պահել, նաեւ պաշտպանության ընթացքում առցանց հարց ուղղել, որը ԲՈԿ-ը կփոխանցի հայցորդին:
Գոհար ՀԱԿՈԲՅԱՆ
