Պետական գույքի կառավարման կոմիտեի աշխատակիցներին 2018-ի տարեվերջին եւս տրվել է 13-րդ աշխատավարձ:
Այսօր այս մասին կառավարության նիստից հետո լրագրողների հետ ճեպազրույցում ասաց կոմիտեի նախագահ Նարեկ Բաբայանը։ Պարգեւավճարների չափն, ըստ Բաբայանի, կազմել է մեկ դրույքի չափով:
Հարցին՝ ինքն իրեն պարգեւատրե՞լ է, ինչպես մյուս գերատեսչության ղեկավարները, Բաբայանը պատասխանեց՝ «Ես իրավասություն չունեմ ինձ պարգեւատրելու»:
Տրանսպորտի, կապի եւ տեղեկատվական տեխնոլոգիաների նախարարության աշխատակիցներն էլ պարգեւավճարներ են ստացել: Այսօր այս մասին լրագրողներին ասաց նախարար Հակոբ Արշակյանը: Թե որքան է կազմել պարգեւավճարների ֆոնդը, Արշակյանն ասաց. «Չեմ կարող ստույգ պատասխանել: 2019 թվականի համար մենք ունեցել ենք պարգեւատրման 10 տոկոսանոց ֆոնդ, որը ստանդարտ դրված է եղել եւ եւս 20% ավելացվել է, որպեսզի այդ ուղղահայաց պարգեւատրումները հնարավոր լինի անել կառավարչական տեսանկյունից եւ որպեսզի կառավարիչը հնարավորություն ստանա իմ նշած սկզբունքներն առաջնահերթության, պարտաճանաչության, առաջնորդության ստանձնմամբ եւ նախաձեռնողականության սկզբունքներն առաջ տանել ի շահ Հայաստանի»:
Նելլի ԲԱԲԱՅԱՆ
