«Անձնական տվյալների մասին տեղեկատվության գաղտնիության պահպանման իրավական պարտականություն ունենք, եւ կոնկրետ թվեր չեմ ներկայացնի»,-այսօր կառավարության նիստից հետո լրագրողների հետ ճեպազրույցում ասաց ՊԵԿ նախագահն, անդրադառնալով երեկ աղմուկ հանած ՊԵԿ-ի աստղաբաշխական չափերի հասնող պարգեւավճարներին:
«Երբ ներկայացնեմ տարեկան իմ հայտարարագիրը, կտեսնեք իմ բոլոր թվերը: Ես, ընդհանուր առմամբ, ասում եմ, որ տեղեկատվությունը սուտ է, այն առումով, որ նման պարգեւատրումներ հնարավոր չէ, որ լինեն, այդպիսի մեծ թվեր չկան»,-ասաց Անանյանը:
Ըստ մի հրապարակման, ՊԵԿ նախագահը տարեվերջին պարգեւավճար է ստացել՝ 8 մլն 55 000 դրամ, ՊԵԿ նախագահի առաջին տեղակալ Ռաֆիկ Մաշադյանը՝ 9 մլն. 60 000 դրամ, ՊԵԿ նախագահի օգնական Էլիզաբեթ Մամիկոնյանը՝ 2 մլն 120 000 դրամ, ՊԵԿ նախագահի խորհրդական, ՀՀ ֆինանսների նախկին նախարար Վարդան Արամյանի գործավարուհի Սաթինե Գզողյանը՝ 2 մլն. 763 000 դրամի չափ:
ՊԵԿ-ն այս առնչությամբ պարզաբանել է՝ «դեկտեմբերին բոլոր պետական գերատեսչություններում ստանում են երկու` նոյեմբեր–դեկտեմբեր ամիսների աշխատավարձերը, երկու ամիսների պարգևատրումներն ու տարեվերջյան հավելավճարները միասին: Հետևապես, հրապարակված տեղեկատվությունը չի համապատասխանում իրականությանը և նման պարգևատրումների չափեր ՊԵԿ-ում չկան»:
«Առձեռն վճարված պարգեւատրման չափը առավելագույնը կազմել է 1.5 միլիոն դրամ: Պարգեւատրվել են բոլորը՝ ինձանից սկսած մինչեւ հավաքարարն ու տեսուչները: Կան նաեւ հավելավճարներ՝ օրենքով են սահմանված»,-ասաց Անանյանը: Նրա ներկայացմամբ՝ ՊԵԿ-ն, ի տարբերություն այլ գերատեսչությունների, պարգեւավճարների ավելի մեծ ֆոնդ ունի եւ հնարավորություն ունի ավելի մեծ պարգեւավճարների, քանի կոռուպցիոն ռիսկերը մեծ են .«Կոռուպցիայի դեմ պայքարի արդյունավետ եղանակը արժանապատիվ ու մոտիվացիոն համակարգեր ստեղծելն է»:
Անանյանի վստահեցմամբ՝ «Բոլորը ստանում են իրենց ադեկվատության, իրենց ստեղծած արժեքին համապատասխան պարգեւավճարներ»:
ՊԵԿ ղեկավարի կարծիքով՝ «Այդ ամենը պետք է մարդկային, անձնական արժեքների հետ համադրվի: Եթե մենք հայրենասիրության սերմեր ենք ցանում ու մարդկային արժեքներ ուզում պրոպագանդել, որ մարդն ունենա բարձր արժեքային համակարգ, ու դրանով սահմանափակվում ենք, երկար չենք գնա»: Անանյանն այս ենթատեքստում մի հումոր հիշեցրեց՝ «Ասում են՝շատ հայրենասերը, վերջերս պարզվեց, որ այլեւս չի ձգում: Հայրենասիրությունը, համարժեք վարձատրությունն ու արժեքային համակարգը, այս երեքը միասին կաշառակերության դեմ պայքարի անկյունաքարն է»:
Aravot.am-ի հարցին՝ արդյոք չպետք է վերացվի պարգեւավճարների «ավանդույթը», քանի որ այն սուբյեկտիվ մոտեցում կարող է ունենալ, եւ ասենք՝ ինչպես Անանյանն իր խորհրդականին մոտ 3 միլիոն դրամ է պարգեւատրել, պարզ չէ՝ ինչ աշխատանքի դիմաց, իսկ որեւէ տեսուչ գուցե ավելի լավ է աշխատել, Անանյանն այսպես արձագանքեց.«Մենք պարգեւավճարների եւ հավելավճարների մշակույթը պետք է զարգացնենք եւ պետական համակարգը այդպիսին պետք է լինի»:
Մանրամասն՝ շուտով տեսանյութում
Նելլի ԲԱԲԱՅԱՆ
