Այրում համայնքի (որը ներառում է նաեւ Բագրատաշեն գյուղը) ղեկավար Արայիկ Պարանյանին հարցրինք Բագրատաշենի մաքսակետում եւ դրան հարող տարածքում իրավիճակի մասին: Նա ասաց, որ անդորր է, 2 օր առաջ Թուրքիայից ապրանքներ ներկրողները փակել էին ավտոճանապարհը, ավտոմեքենաների մեծ խցանում է գոյացել: Դա առաջացրել է «ֆուռերի» վարորդների զայրութը, քանի որ խցանման մեջ շատ էին մեծ բեռնատարները: Լարսի անցակետը նոր էր բացվել,Հայաստան մտնող մեծ թվով մեքենաներ կային, ճանապարհի փակումը բարդացրել է իրավիճակը:
Այրում համայնքի ղեկավարն ասաց, որ Բագրատաշենի մաքսակետի աշխատողները թույլատրում են Թուրքիայից ժամանողների համար առանց մաքսի մինչեւ 25 կգ բեռի Հայաստան ներկրումը: Նախկինում առետրականները հնարքի էին դիմում՝ ապրանքը կուտակելով մաքսային տերմինալում, տարբեր անձանց անձնագրերով դրանք դուրս էին հանում: Ներկայումս մաքսակետի տերմինալից առանց մաքսավճարի մինչեւ 25 կգ ապրանք բաց է թողնվում միայն այն անձանց,ում անձնագրի մեջ առկա է Թուրքիա ելումուտի դրոշմակնիք:
Ոսկան ՍԱՐԳՍՅԱՆ
